RESUBELPARA: North Garo Hills a·jao Rangselgre songni rama jal·langrang namsrangjahani a·sel songni nokni manderang re·ruraanirango neng·nikanirangko chagrongna nangtokenga ine parakatenba, Boda A·pal Bazar-oni Dame A·pal-Raja A·pal Bazar main road-ona Rangselgre song gita tarie on·china a·dokni Chief Minister Conrad K Sangma-ko didiataha.
Rangselgre songni manderangni pal saksa Nicholas Nithin Sangma minggipa mandeni parakatani gitade, ia ramako Tura-ni gitcham MP Agatha K Sangma-ni somoion tariahachim indiba ja·mano ia ramako galchipe donahani a·sel da·o rama namsrangjae, songni nokni manderang, gari gorarango re·na dona man·tokjaengaha.
Rangselgre jolo songdongenggipa manderangni namgnina ia ramako PMGSY scheme-o napatenba ta·raken tarie on·china gitaba Sangma, a·dokni Chief Minister-ko didiataha.
Indake ong·engon, Rangselgre jolrango mobile network-ko name man·jaengani a·selba songni nokni manderang aro dingtang dingtang kamrangko ka·enggipa manderang neng·nikanirangko chagrongna nangtokenga ine songni manderang parakatenba, Rangselgre songo mobile tower ge·sako songe on·china Chief Minister-ko didiataha.
“Rangselgre songara, North Garo Hills a·jani headquarter Resubelpara-oni km 7-mangsan chel·grikaioba ia jolrango network namsrangjani a·sel songni manderang neng·nikanirangko chagrongna nangtokenga. Ia chasongo pilak kamrangnan an·chingna mobile network aro internet-rangko nangaha aro iandakgipa obostao songni manderang, mongsongbate poraienggipa chatro chatrirang aro office-ni kamrangko ka·enggiparang neng·nikanirangko chagrongna nangrongenga,” ine Nicholas Nithin Sangma parakataha.
Una agreba, Rangselgre songo Anganwadi centre-ko kulie on·china gita songni manderang, Chief Minister-ko didiataha.
Rangselgre songna community hall aro kal·chakram biap damsako rike on·china gitaba songni manderang, a·dokni Chief Minister Conrad Sangma-ko mol·molataha.
 |
ReplyForward
|