TURA: Sal somoirangko nie agansamsona man·na gita Tura-oba bakan Indian Meteorological Department (IMD)-ni weather station-ko kulina siengaha ine official-rang parakataha.
Official saksani u·iatani gitade, ia weather station-ko Tura-ni PA Sangma Stadium sambao kuligen aro ian dingtangmancha Garo Hills gimikna sal somoirangko agansamsoani chol ong·gen.
Iani bidingo adita salrangna skangsan, IMD-Shillong, CPWD-Tura aro West Garo Hills DC office-o donggipa Revenue office-ni officer-rang, biapko niangaha ineba official parakataha.
Ia weather station-na da·o biapko tik ka·manahaoba kamrangko a·bachengna gita dakna nanggni kamrang bang·kuenga ineba official u·iataha.
Ia weather station-ko kuliahaode ian Garo Hills-o mikka balwa ta·rakgni aro dingtang dingtang a·sel ong·gnirangko u·iatsamsoe, manderangna naljokani aro tarisamsoanirangko dakna dakchakani ong·gnok ineba official-rang parakataha.