TURA: Chibinang-oni Rajabala-ona dakanggipa kilometre 30 ong·gipa rama, jekon Agia-Medhipara-Phulbari-Tura (AMPT) ba National Highway-127B ineba ma·sitokachim, ia ramani bak namsrangjahani a·sel ramako re·ruraenggipa manderang aro mongsongbate jolo songdongenggipa manderang, neng·nikanirangko chagrongna nangtokenga ine Federation of Khasi Jaintia & Garo People (FKJGP) Chibinang unit parakatenba, ia ramako ta·raken taripile on·china a·dok sorkariko didiataha.
“AMPT rama, jekon NH-127B ine ma·sitoka, Chibinang-oni Rajabala-ona km 27-30-mang ong·gipa rama, ru·uta bilsirangonin namsrangjahani a·sel neng·nikanirangko chagrongna nangtokenga. Ia ramako changni chang tarina tangka paisarangko chame on·engoba, ia ramani bakrang skangonin apsanchipaia,” ine FKJGP Chibinang unit-ni president Binoth A Sangma parakataha.
Ia ramako taria changantian manderang, jagni ba jagittammangnasan rama namako re·manaia indiba uni ja·mande ramarang nosto ong·na a·bachengrongaia ineba Sangma matnangataha.
“Iandake ia ramani ta·raken nosto ong·aniara, contractor-rangni kam namgijaniko aro tangka paisa jakkalsretaniko mesokani ong·enga,” ine FKJGP Chibinang unit-ni president parakataha.
Ramarangko name tarina gisik nanggijagipa aro tangka paisa jakkalsretgipa contractor-rangni kosako rakgipa ja·kurangko de·china sorkariko didiatengon, mikkangchi ia ramarangko tarina gita gipin biaprangoni company-rangna on·ani pal, joltangni tribal contractor-rangna on·skana nanga ine Sangma dabiangaha.
