SHILLONG: Bengaluru songjinmani Mahadevapura-o jadokna voter roll-rangko sandirokanio, bang·en ong·gija dakanirangko, chong·motan mande saksani biming baditaba dam polling station-rango donganiko nikna man·ahani gimin iandake ‘vote cha·uanichi’ Meghalaya a·dokni election-rangoba nangchakeaniko ra·baani cholrang dongaia ine Meghalaya Pradesh Congress Committee (MPCC) parakataha.
Bengaluru songjinmao Congress dolni sak 40 membor-rang, electoral roll-rangko sandirokanio, sak lak 6.5-mangoni sak 1,00,250-ni bimingrangko ong·gija dake segataniko aro mande saksani bimingkon baditaba dam polling station-rangko segataniko nikna man·ahachim.
Iani bidingo MPCC-ni secretary Manuel Badwar, a·dokni manderangna mikrakataniko on·angengon, ian political party-rangni gisepo susagrikani katta ong·ja indiba election-ko ong·atanio a·songni gunko rakkiani kattasa ong·enga ine aganaha.
Iandake electoral roll-rangko tarianichi, ‘mande saksa vote ge·sa’-ni miksonganikon pe·ani ong·engaha ine janapatengon, iandake electoral roll-rangon ong·gija dakanirang donggenchimode darangan election-ni result-rangkoba bebera·na man·jawaha ine Badwar parakataha.
Electoral roll-rangko rongtale rakkiosa bilo aro opposition-o ong·enggipa dilgiparangkoba chel·chakna man·a ineba MPCC-ni secretary aganaha.
Mahadevapura-o Election Commission-ni data baksa Congress-ni sandirokanio, saksa mandekon baditaba dam polling station-rango biming seani ming 11,965 case-rangko nikna man·ahachim.
Indake ong·engon, Meghalaya a·dokni East aro West Khasi Hills a·jarang, Ri Bhoi, Jaintia Hills aro Garo Hills-oba, iandake manderangko biming seanio, mande saksakon baditaba dam polling station-rango segenchimode, election-ni result-rangko dingtangatna man·aigen ine Badwar parakataha.
Iandake olgrokanirangko gapatna gita batanggimin bilsi 10-na machine readable booth-wise roll-rangko tarichina, sedapgimin aro den·galgimin bimingrangko chapa ka·china, pu·onani salrango CCTV camera-chi ka·e ra·china, jeon video-rang gimaa uarangni bidingo jinmana talataniko on·china aro official-rangni bimingrangko minge on·china MPCC dabiangaha.