Chu·gimik ja 43-ni dormahakon on·china NGEA dabiskaa
TURA: Garo Hills Autonomous District Council (GHADC)-o kam ka·enggiparang, ja 43 ong·pile dormaharangko man·tokkujaengani gimin kamrangko dontonge jingjengatengon, da·o uamangni jingjengatani jasa salbri ong·pilahaoba maming aganchakanirangko man·kujaengani gimin jingjengataniko bilakbatatna tik ka·angaha ine Non-Gazetted Employees Association (NGEA) parakataha.
GHADC-o kam ka·enggiparang, ja 43-ni dormaharangko man·kujaengani gimin re·anggipa July 7 tarikonin, kamrangko ka·gija jingjengatna a·bachengatahachim indiba da·o jasa batpilengahaoba, uamangni dabianirangko chu·sokate on·ani bidingo Executive Committee (EC)-oni maming ku·rachakanirangko on·a dongskakujaengachim.
NGEA-ni jingjengatanio, Garo Hills-ni dingtang dingtang dolrangba bakrimanirangko on·tokenga ine nikna man·a.
“Chingni kamrangko dontongate jingjengatani da·o jasa salbri ong·pilahaoba GHADC-ko chalaienggipa EC-oni chingna maming ka·dongatani kattarangko ba chingona re·bae sing·sandie niaba dongkuja. Chingaba chingni man·na nangkuenggipa ja 43-ni dormaharangko on·chinasa dabienga aro chingna dormaharangko on·gija dongaigenchimode chinga bilsisa batpileba jingjengataniko dakangkuaigen,” ine Sombar salo, NGEA-ni president Brithen M Sangma aganaha.
Jingjengataniko a·bachengmiting somoioba uamang, bilsisani dormahako on·chengchinasa uamang dabiaiachim indiba uamangni dabianirangna EC-ni dilgiparang nachil songna gisik nangjahani gimin da·o uamangna chu·gimik ja 43-ni dormaharangko on·na nanggnok ineba Sangma aganaha.
“Chingna ja 43-ni dormahako on·ja ong·ode chinga kamtangtangko ka·pilkujawa aro office-koba kulina on·jawa,” ine NGEA-ni president parakataha.
GHADC-ni Chief Executive Membor Albinush Marak, Deputy CEM Nikman Ch Marak aro Finance-ni in-charge Executive Membor Linekar K Sangma-ko kam watchina gitaba GHADC-o kam ka·enggiparang dabiangtokaha.
“Indita bilsirangna chinga chakchike kamrangko ka·e on·aha indiba da·alonan chingni grapanirangko uamang knachakna gisiko nangjaenga. Uni gimin chinga ia changode chingni dabiani aro jingjengataniko dontongteljawaha aro chingna chu·gimik ja 43-ni dormahako on·jaskalde chinga maming dakeba uamangni agananiko knachakjawaha,” ine Sangma parakataha.