SHILLONG: Eastern West Khasi Hills a·jao Mairang C&RD Block-ni gital Block Integrated Development Complex-ko Mongolbar salo, a·doko saksa jatni artist aro North East Young Talent Artistes Award-ko man·gipa Marborsing Marbaniang-ni jakchi nokdonggae on·angaha aro ia gital nokko nokdonggaanio, a·dokni Chief Minister Conrad K Sangma, C&RD Minister AT Mondal, Health Minister Ampareen Lyngdoh, Sports Minister Shakliar Warjri, Mairang constituency-ni MLA Metbah Lyngdoh aro dingtang dingtang official-rangba dongpae bak ra·angtokaha.
Mairang C&RD Block-ni Block Integrated Development Complex-ko nokdonggaanio, a·dokni Chief Minister, jinmana aganprakangengon, a·dokni pilak biaprangon district aro block office-rangko namdapatna gita sorkari, gong kror 2500-na baten tangka paisarangko chame on·aha aro iachi dingtang dingtang biaprango songdongenggipa manderangona sorkarini kamrangko sepangbatatna man·enga ine parakataha.
Ia salni bako Mairang Block office-ko nokdonggaaniara, a·dokni pilak biaprango donggipa block office-rangko namdapatna sorkarini kam ka·anio, mingsa chu·sokani aro ja·ku de·ani ong·enga ineba ua aganaha.
Ia apsan somoion, Mairang-o donggipa Tirot Sing Memorial Hospital-o gital kuligipa Sick New Born Care Unit (SNCU), Paediatric Intensive Care Unit (PICU), Adult Intensive Care Unit (AICU), aro High Dependency Unit (HDU)-koba oprake on·angjolaha.
