SHILLONG: Budbar salo, Meghalaya Legislative Assembly-ni Business Advisory Committee (BAC), Assembly-ni New Conference Room-o tom·e chanchirimangenba, Assembly-ni Autumn Session-ko re·baenggipa September jani 8 tarikoni 12 tarikona ong·atna tik ka·e donangaha.
BAC-ni tom·aniko, Assembly-ni Speaker Thomas A Sangma dilangaha aro ia tom·anio a·dokni Deputy Chief Minister Prestone Tynsong, Member Charles Pyngrope, Member Lahkmen Rymbui aro gipin official-rang bak ra·angaha aro Oppostion dolni dilgipa Mukul Sangma-ba video conference gita Tura DC office-oni bak ra·angaha.
Ia salbongana ong·atenggipa Autumn Session-o Government Business-na salgittamko aro Private Membor-rangni Business-na salgniko tik ka·angaha.
BAC-ni tom·a matchotani ja·man, kobor ra·timgiparangna talataniko on·angengon, “Re·baenggipa Autmun Session-na tarikrangko tik ka·na gita da·alo chinga BAC-ni tom·aniko ong·ataha aro ia tom·anio committee-ni pilak membor-rang aro Opposition dolni dilgipaba Tura-oni internet gita bak ra·angaha.
Ia Autumn Session-ko September 8 tarikoni 12 tarikona salbongana ong·atna tik ka·aha aro iako BAC ra·chakangaha,” ine Assembly-ni Speaker Thomas A Sangma parakataha.
Ia chang Autumn Session-ko Sukrobar saloni a·bachenggija Sombar saloni Sukrobar salona ong·atskana tik ka·ahani gimin sing·on, “Session-rangko Sukrobar saloni ong·atna nangtela ong·ja. Re·anggipa bilsio Autumn Session-ko Sukrobar salo a·bachengaha indiba Janmashtami-na chutti dongani gimin Sukrobar salo matchotatna nangaha. Ia chango Government Business-rang komibatani gimin Sombar saloni a·bachengate Sukrobar salo matchotatna tik ka·aha,” ine Sangma parakataha.