SHILLONG: Tura Parliamentary Constituency-ni ning·o sanna bananirangko nambate on·na man·na gita da·o rikenggipa Tura Medical College-ni pal All India Institute of Medical Science (AIIMS)-ko kuliskachina aro ia institute-o kam ka·giparangkoba chu·gimikkon sorkarini ning·o ong·atchina Tura-ni Lok Sabha MP Saleng A Sangma, a·songni Prime Minister Narendra Modi-ko didiataha.
Iani bidingo a·songni Prime Minister-na sedoatengon, Public-Private Partnership (PPP) mode-o chalaina miksongenggipa Tura Medical College-ni pal AIIMS-ko kuliskana man·genchimode ian Garo Hills-o sanna banani kamrangko nambatatna aro medical-ko poraina sikenggipa chadamberangna nambata cholrangko on·na man·gen ine Tura MP parakataha.
Sangma-ni parakatani gitade, Tura Medical College project-ko 90:10 ratio-o ma·mong sorkari, kror 189 korosrangchi kulina gita 2017 bilsio ra·chakahachim indiba da·o ia Medical College-ko a·dok sorkari, private company baksa bakrimesa chalaina miksongskaengachim.
Tura Medical College-ko sak 150 MBBS chatro chatrirangko ra·e chalaina gita Meghalaya sorkari, Expression of Interest (EoI)-koba on·manahachim.
Indake ong·engon, sorkarini tangka paisarangchi kuligipa Medical college-ko PPP mode-o chalaina miksonganiara manderangni tangka paisarangnasan ong·aigija private company-chi sason ka·ani bidingo manderangna jajrengna nanganiko ong·atenga ine Sangma parakataha.
“Iandake sorkarini tangka paisarangchi kuligipa institute-rangko private company-rangni man·gni dake ong·ataniara manderangni tangka paisarangko bon·atasan ong·jaenga indiba joltangni manderangna kam ka·e cha·ani cholrangkoba komiatenga. Ian Tura constituency-o Tribal manderangna kam ka·e cha·ani cholrangko champengani gitaba ong·a,” ine Tura MP parakataha.
Medical college-ko private company-rangchi chalaina on·aniara sanna bananirangna bate man·gnirangna rikanikosa ong·atani cholrang donga ine janapatengon, ia college-na tik ka·gimin fee-rang donggenchimoba, chatro chatrirangna admission on·anio NRI quota-koba man·chapna nanggenchimode, Garo Hills-ni nokdangrang neng·nikanirangko chagrongna nangnaba gnang ine Sangma, mikrakataniko on·angaha.
Tura medical college-ko ge 505 palang donggipa Tura Civil Hospital aro ge 100 palangrang donggipa District Maternity & Child Health Hospital baksa chapatchina didiatskaengon, iachi dingtang dingtang gadangrango ge 2000-oni ge 3000-mangni gita kamrangko ong·katatna dakchakgen ine Tura MP parakataha.