SHILLONG: Meghalaya a·doko Trinamool Congress (TMC)-ni ning·o jingjenganirang batrikrikenganina a·dokni chief Charles Pyngrope aganangaha, Party-ko 2028 bilsini Assembly-ona apsan ong·ate dongatgen, ian mikkangchina ka·dongsoani ong·enga.
TMC-ni legislator-rang da·o dipet party-na uamang kakket ong·e dongkuenga aro dongangkugen ine Pyngrope gisiko nangbate aganangaha.
“Assembly election-ona kingking tangchongmotgen maina seoka man·gipa membor-rang changgipin election 2028 bilsio ong·kuja dipetna House-o party-ni bak ong·e dongna chinga ku·rachakaha. Indiba na·a angko re·baenggipa election-ni bidingo sing·a ong·ode, party ong·e TMC chadenggenma aro election-ko dakgrikgenma iarangna anga da·o dipet joljolde aganchakangna nangnikjaenga,” ine ua aganaha.
Gipin party-rangoni MLA-rangko ra·sekenganio sasono dongenggipa National People’s Party (NPP)-ko matnangengani bidingo sing·angaha. Pyngrope sing·anirangna aganchakna jechakaha, indakgipa chanchianirangko jensalo dolongko gabatmanaha unosa chanchigen, ine uakosan aganchakaiaha.
Re·baenggipa poll-rangna kam ka·angna Meghalaya-ni TMC tarimanengaha aro political-na kakket ong·giparang gital ramako taritaiengaha, ine ua aganaha.
Nongthymmai constituency-oni uni party dilgiparang aro party worker-rang namroroanina on·kanganiko on·angna congress-o bakrimanaha, ineba janapataha.
A·doko Congress-ni ga·akani gimin dilgiparangni a·sel ga·aka ine Pyngrope matnange aganaha.
A·doko batanggimin bilsirangode Congress-ba House-o dongpaachim, MLA-rang ong·rikrikani a·sek komirikrikangaha. Da·o Assembly sak 60 membor-rangoni Congress MLA saksaba dongjaha.
Pyngrope an·tangba Congress mande ong·ani gimin uni katta agananio mamingkoba aganjaha. Jahas pangnan captain-osa pangchakaia, political party-ni tanganiba uni dilgiparangani bilakaniosa chu·gimikan pangchakaia, inesan ua aganaha. Bilgri captain jahasko chodilna man·ja indiba sripdila, ine uni kattao aganaha.
“Chakatani aro ga·akani gimikan dilgipao pangchaka. Nang·o bilgrigipa dilgipa dongode nang·ni jahas chojawa aro na·simang gimikan sripanggen. Uni gimin ian maiko anga aganna amgipani bidingo ong·enga,” ine Pyngrope aganaha.
Congress dolo saksamangmang legislator donggipa Ronnie Lyngdoh-ba mejamangmang NPP dolo napangaha.
2023 bilsini Assembly poll-o Congress doloni dam 5 seat-rango cheaha. Uamangoni sakgittam membor-rang Charles Marngar, Celestine Lyngdoh aro Gabriel Wahlang batanggimin bilsini September jao NPP-o napaha. Brigipa Saleng A Sangma, batanggimin bilsio Lok Sabha election-o cheani gimin House-oni kamko watangaha.
2021 bilsini November jao Congress dol bak dakna a·bacahengaha, sak 17 Congress MLA-rangoni sak 12 gitcham Chief Minister Mukul Sangma-ni dilanichi TMC-o napaha. Somoirang badeangaha sakgittam MLA-rang NPP-o bakrimangaha aro sak 2 donggiparang United Democratic Party-o bakrimangaha. 2023 bilsio Assembly Poll ong·atao Congress doloni MLA saksaba dongja.
