SHILLONG: Meghalaya aro Assam a·dok simarango ong·enggipa golmalrangko namatna gita a·dok damgnini sorkarirang, kamrangko ka·engon, Sombar saloba a·dok damgnini simarango donggipa manderang, so·sojengjeng ong·aniko chagrongna nangtaiaha.
Koborko on·ani gitade, Ri Bhoi a·jani Maikhuli songo, Assam State Electricity Board (ASEB)-ni niam gri bijoli krong songaniko jegale, ia krongrangko ra·galani ja·man, dolgnini gisepo dinggrikani ong·kataha.
“ASEB-ni songe donanggipa bijoli krongrangko Sombar pringo, Maikhuli songni manderang pe·e galenba noktangtangchi re·angpiltokahachim indiba ja·mano Assam-oni dolsa manderang, ua biapona re·baenba, krong pe·gipa manderangko sandieaha. Assam-ni manderang sokbaahani ja·man dolgnini gisepo kajia ong·na a·bachengaha aro ja·mano dolgni, dinggrikna a·bachengaha,” ine kobor on·timgiparang parakataha.
Kobor on·timgiparangni aganani gitade, dolgni dinggrikengmiting somoio Assam-ni manderang, Maikhuli songni me·chikrangko kragija dake chadrapani a·sel uamangni ba·ra cholrangba gin·aha aro songni me·asarangkoba doke sate donangaha.
Ja·mano a·sel ong·gipa biapona Assam aro Meghalaya a·dok damgnionin police-rang aro official-rang sokbaenba, dolgnini so·sojengjeng ong·ako namatena man·aha aro ja·mano manderangkoba ua biaponiko watattokaha ine kobor on·aha.
Mikkangchi ia jolrango iandake so·sojengjeng ong·anirangko champengna aro tom·tomaniko rakkiangna gita a·dok damgnionin dilgiparang, dingtangmancha Peace Committee-koba songe donangjolaha.