ILP-ko ra·gate on·anio somoi ra·chae donggenchimode an·tangtang ja·kuko de·gen ine mikrakata
SHILLONG: Ru·uta bilsirangna dabiengahaoba da·alonan chu·sokate on·chipkujaengani gimin Sombar salo Khasi Students Union (KSU)-ni membor-rang, Inner Line Permit (ILP)-na dabie, Shillong songjinmao jingjengataniko dakangtaiaha. Mizoram a·dokna on·na ku·rachaka gitan Meghalaya a·doknaba Territorial Army-ko on·china gitaba KSU, ma·mong sorkario dabiangaha.
ILP-ko ra·gate on·anio somoi ra·chae dongaigenchim ong·ode, uamang an·tangtangan niamko jako ra·e nanga gita ja·kurangko de·anggen ineba KSU mikrakataniko on·angaha.
Khyndailad-o donggipa gitcham Assembly nok mikkango asonge jingjengatengmiting somoio kobor ra·timgipa manderang baksa agangrikengon, simarang gita napsrukaniko bilakbate nirokna aro a·doko rakgipa niamrangchi nirokna man·na gita ILP-ko ra·gate on·china KSU-ni general secretary Donald V Thabah dabiangaha.
A·doktango ‘Manderangni sipai dolko’ bikotna dabianiara, 2001 bilsio Pyrdiwah-o a·sel ong·ani somoion KSU-ni dabichenggipa ong·a aro ua somoio da·o Cabinet Minister ong·enggipa Paul Lyngdoh-an KSU-ni president ong·achim ineba Thabah, gisik ra·atpiltaianiko on·angaha.
“Ua somoirangon chinga a·dokni simarangko nirokna aro chel·chakna gita ‘People’s Army’-ko bikotchina a·dok sorkario didiahachim. Da·o Mizoram a·dokna ‘Territorial Army’-ko bikotna ma·mong sorkari bilko on·ahani gimin Meghalaya a·dokna apsan cholko on·na nanga,” ine Thabah aganaha.
Iandakgipa sipai dolo, officer aro sipairangba a·doktangni Tribalrangsa ong·na nanga ineba ua aganaha.
“Mizoram a·dokna territorial army-ko ma·mong sorkari on·na man·a ong·ode maini gimin Meghalaya-na man·jawa?” ine KSU-ni general secretary sing·doataha.
A·dokona niam gri napsrukgiparangna kenchakna nangani gimin janapatengon, Assam-o niam gri songdong a·chaenggipa manderangko Assam sorkari a·rikgalengani gimin aro Bangladesh a·songoba so·sojengjeng ong·anirang namsrangkujaengani gimin iandakgipa manderang, Meghalaya a·doko katnapskana jotton ka·ani cholrang dongaia ine Thabah aganaha.
Meghalaya a·doko ILP-ko ra·gatna gisiko nangjaenga ine ua ma·mong aro a·dok sorkari dolgnikon matnangataha.
A·dokni simarango, ramarango aro cholgugarango KSU-ni membor-rang, an·tangtangan nirok sandianirangko dake, ILP gita dakgipa niamko ra·gatna a·bachengaha ineba KSU-ni general secretary parakataha.
Iandake kamrangko ka·aniara niamko jako ra·ani gita ong·jaengama ine sing·on, “Meghalaya a·doko songdongenggipa Tribal-rangko chel·chakna da·alona kingkingan maming rakgipa niamrang dongkujani gimin chinga ia ja·kuko de·na nangao ga·akaha. Sorkari kamko ka·na changjaenga ong·ode chinga ka·skagen,” ine Thabah parakataha.