GHADC-o kam ka·giparangna grorang gitcham EC-rangonisa ine NPP EC matnanga
TURA: Garo Hills Autonomous District Council (GHADC)-o kam ka·giparang, chu·gimik ja 43-ni dormaharangko on·china dabie jingjengatanirangko dakengon, Sombar salo, National People’s Party (NPP)-chi dilenggipa Executive Committee (EC)-ni dilgiparang, Non Gazetted Employees Association (NGEA)-ni dilgiparangko grongenba, jabrini dormaharangko on·chengna ku·rachakahachim indiba NGEA-ni dilgiparang, jabrini dormahako ra·chakna jechaktokaha.
GHADC-o kam ka·giparangna jabrini dormaharangko on·na gita GHADC-ni Chief Executive Membor (CEM) Albinush Marak, ku·rachakaniko on·ahachim indiba GHADC-o kam ka·giparang, ia jabrini dormahako ra·chakna jechakskaenba, chu·gimik ja 43-ni dormaharangko on·kujaskalde jingjengataniko dontongjawa ine parakatskaaha.
NGEA-ni dilgiparangko grongani ja·man, kobor ra·timgipa manderang baksa agangrikengon, “Chingo da·o dipet Chief Minister Conrad K Sangma-ni watatgipa gong 24,450,920 tangkarangsan dongaia indiba ia tangkarang, kam ka·giparangna jabrini dormahakode on·na chu·ongachim. Iani giminsa chinga da·alo, NGEA-ni dilgiparangko okame agangrikaha. Ia jabrini dormaha baksana chingni a·bachengo on·na tik ka·gimin jasani dormahakoba chinga on·na miksongengachim,” ine GHADC-ni Deputy CEM Nikman Ch Marak aganaha.
Marak-ni parakatani gitade, re·anggipa antiosan uamang, a·dok sorkari baksa ia obostani bidingo tom·e agangrikaha aro ia tom·anio a·dokni Chief Minister, jaantian GHADC-ni account-ona tangka paisarangko watatgnok ine ku·rachakaniko on·ataha.
“Da·ode GHADC-o kam ka·giparangna chingade dormaharangko on·na nangjawaha indiba a·dok sorkarisa dormaharangko Deputy Commissioner gita watatskagnok. Iani bidingo chinga kam ka·gipa mande sakantini bimingrangkon DC-na on·atna nanggen,” ine Marak aganaha.
GHADC-o kam ka·giparang da·o sak 1300-san dongaiaha ine a·kangenggipana aganchakaniko on·angengon, “Da·o 2025 bilsiode GHADC-o kam ka·giparang sak 1300-san dongaiaha indiba chinga ia 2025 bilsimangmangni dormahakosan on·na nangenga ong·ja. 2025 bilsina skang dongbagipa grorangkoba da·o chinga gamna nangengani gimin sak 1600-1700-mangni dormaharangkode chinga on·na nangkuaigen,” ine GHADC-ni Deputy CEM talataniko on·angaha.
GHADC-o kam ka·giparangna bangki grorangko matchote on·na man·ahaode 2025 bilsi dipet ja·man EC-rangde dormaharangko on·anio altubataignok ineba Marak aganaha.
Gitcham Congress EC-ni somoirango, maming interview gri kam ka·giparangko rakkidapdapani a·selsa GHADC-o kam ka·giparangna dormahako on·anio neng·nikanirangko chagrongna nangaha ineba Marak matnangataha.