TURA: West Garo Hills a·jani New Bhaitbari Post Office-o Post Master ong·e kamko ka·enggipa mande, kamtangko name ka·jaengani a·sel post office-ni nangchongmota kamrangko ka·na nanggipa manderang neng·nikanirangko chagrongna nangtokenga ine All Meghalaya Minority Students Union (AMMSU), West Garo Hills Division-ni Superintendent of Post Office-na badi ka·e sedoataha.
AMMSU-ni president Nur Islam-ni parakatani gitade, New Bhaitbari post office-ni post master, office-chi re·aba tik ong·ja aro antini bang·bata salrangon post office-ko chipe donrongaiani a·sel kam nangana re·angenggipa manderang neng·nikanirangko chagrongna nangtokenga.
“Ia post master, antio salsa ba salgnirangsan kamtangchi re·rongaia aro kam ka·ani salrangoba ia post master, office-ni somoiko ja·rikrongja,” ine AMMSU-ni president parakataha.
Islam-ni parakatani gitade, ia post office gita mail delivery, bank-ni kamrang, saving scheme-rang aro sorkarini dingtang dingtang kamrangko ra·anioba manderang neng·nikanirangko chagrongna nangrongenga.
“Iandake post office-ko name chalaijaengani a·selan manderangni gisepo ka·dongna man·gijako aro chu·ongnikgijaniko ra·baaha,” ine AMMSU-ni president parakatenba, ia post master-ni kosako rakgipa ja·kurangko de·china aro ia New Bhaitbari post office-ko name chalaina ge·etchina West Garo Hills Division-ni Superintendent of Post Office-ko didiataha.