SHILLONG: Bangladesh a·songoni niam gri napsrukanirangko champengna man·jaengani a·selan salgro salaram a·dokrango gipin jatrangni jelbra jelsuani batroroengaha aro ian a·doktango songdongenggipa Tribal manderangna kenchakna nangani ong·enga ine parakatenba, Sombar salo North East Students Organisation (NESO)-ni membor-rang, salgro salaramni dingtang dingtang biaprango jingjengatanirangko dakangtokaha.
NESO-ni jingjengataniko Shillong songjinmaoba ong·atangaha aro ia jingjengatanio NESO-ni chairman Samuel B Jyrwa, kobor ra·timgipa manderang baksa agangrikengon, Bangladesh a·songoni napsrukbaenggipa manderangko champengna gita rakgipa ja·kurangko de·china ma·mong sorkari aro a·dok sorkarirango dabie da·alo salgro salaram jol gimikon NESO-ni membor-rang jingjengatanirangko dakenga ine parakataha.
“Simarang gita dingtang dingtang biaprangoni, mongsongbate Bangladesh a·songoni napsrukbagipa manderangni a·sel chinga salgro salaram jolrango songdongenggipa manderang, dingtang dingtang neng·nikanirangko chagrongna nangtokenga. Tripura, Assam aro Meghalaya a·dokoba Bangladesh a·songoni napsrukbagipa manderangni a·sel ong·enggipa obostarangko an·ching pilakan nikna man·enga. Uni giminsa iandake Bangladesh a·songoni napsrukbaenggipa manderangko champengsona gita rakgipa ja·kurangko de·china chinga ma·mong sorkari aro a·dok sorkarirango dabie, ia jingjengataniko dakenga,” ine Jyrwa aganaha.
Niam gri napsrukanirangchi salgro salaram a·dokrango mande jelbra jelsubatenga ine re·anggipa August-ni 15 tariko Prime Minister-ni agangipa kattarangni giminba ua gisik ra·atpilaniko on·angaha.
“Prime Minister an·tangan ia obostani bidingo janapahani gimin mikkangchi salgro salaram jolrango songdongenggipa Tribal manderangni namgnina ma·mong sorkari, rakgipa ja·kurangko de·gen ine chinga ka·dongenga,” ine NESO-ni chairman aganaha.
Meghalaya a·dokna ma·mong sorkari aro a·dok sorkarini Inner Line Permit (ILP)-ko ra·gate on·ningjaengani gimin sing·anina aganchakaniko on·angengon, “ILP-na dabianiara namen gitchambegipa dabianisa ong·a maina 1983 bilsirangonin KSU, Meghalaya a·doko ILP-ko ra·gatchina dabienga. Indake ong·genchimoba da·alonan ma·mong sorkari, Meghalaya a·doko ILP-ko ra·gate on·na gisik nangjaenga,” ine NESO-ni chairman parakataha.
Iani bidingo NESO tom·aniko ong·atenba nanga gita ja·kurangko de·anggen aro iani bidingo manderangnaba u·iatgen ine Jyrwa parakataha.