SHILLONG: Shillong Medical College & Hospital-ko kulie a·bachengna gita a·dok sorkari, Medical Council of India (MCI)-ni Letter of Permission (LoP)-na sengkuenga.
Iani bidingo kobor ra·timgiparangna u·iatengon, Shillong Medical College-ko a·bachengna gita Health department, gisiko nangen ma·mong sorkari baksa agangrikenga ine Mongolbar salo, a·dokni Health & Family Welfare Minister Ampareen Lyngdoh parakataha.
Shillong Medical College-ko a·bachengatani bidingo janapatengon, ia college-ko kulina sorkari pilakni gitan tarimanaha aro director-ba kamtangko jako ra·manaha ine Lyngdoh parakataha.
MBBS seat-rangko bakan jinmana u·iatgnok ine parakatengon, ia college-o skigiparangko ra·na gitade interview-rangko ra·manaha ine Health Minister aganaha.
Adita salrangna skang MCI-ni Meghalaya a·dokona re·bae Shillong medical college-ko niangon, 17 percent-mangni gita kam ka·giparang chu·ongkujaenga ine a·dok sorkarina aganangahachim indiba da·o Shillong Medical College & Hospital-na nangenggipa kam ka·giparangko nanga gita man·engaha ine a·dok sorkari, ka·dongchakenganiko parakatskaaha.
Tura Medical College & Hospital-ko Public-Private Partnership (PPP) mode-o sorkarini chalaina miksongenganiko dingtang dingtang dolrangni jegalenggipani giminde Health Minister, mamingkoba aganna gita jechakskaaha.
Meghalaya a·doko medical college-rangko kulianichi da·o bilsi gittamni gisepon medical officer-rangko man·gnok aro ian a·dokna bang·en namgni ong·gnok ineba ua aganaha.
PHC aro CHC-rango medical officer-rang chu·ongjaengani gimin janapatskaengon, pilak health centre-rangnan sorkari, nangani kri medical officer-rangko sualataha ine Lyngdoh parakataha.
Sorkarini quota-o MBBS-ko poraina re·angenggipa bang·a doctor-rangan a·doktangona re·bapile kamrangko ka·jaenga ine matnangenggipani bidingo sing·anina aganchakaniko on·angskaengon, Meghalaya a·doko registration board donggijanian dal·batgipa neng·nikani ong·a aro sorkarini quota-o MBBS-ko poraina re·anggipa chatro chatrirangoniko bond-ko ra·pilanio neng·nikanirangko man·enga indiba da·o a·doko registry-ko kuliaha aro sorkarini quota-o MBBS poraina re·angenggipa chatro chatri pilakan a·doktangona re·bapile register ka·na nanggnok ine Health Minister parakataha.