Meghalaya-ni skotong railway gri ong·kuenga
SHILLONG: Salgro salaram a·dokrangni skotong songjinmarang gimikon basakoba chasongode railway baksa bate ba komie nangdimatako man·gen, Meghalaya-ni skotong songjinma Shillong-o railway gri ong·kuaienga.
Prime Minister, Narendra Modi September 13 tariko Mizoram-o Bairabi-Sairang railway-ko oprakgen aro ia railway line, skotong songjinmani sepangbatgipa Sairang biap dake railway map-ona Aizawl-ko napatgen.
Apsan dake, Jiribam-Imphal railway line-ko ta·rake matchotatna ka·dongsoengaha. Project-ko tangka kror 14,322-ko chaman baksa 2023 bilsini December-o matchotatna somoiko donachim, indiba bang·a neng·nikanirangko chagrongenba ru·utdapaha.
Ta·rake nangchongmotgipa railway project West Bengal-ni Sivok aro Sikkim-ni Rangpo-ona tarianggipako 2027 bilsini December jao matchotatna ka·dongsoenga.
Jensalo Sivok-Rangpo project bakrogipa km 44.96-ko matchotahaode West Bengal gita a·songni je biaprang baksa Gangtok nangdimatako man·gnok.
Salgro salaram a·dokrangni skotong songjinma gimikon ta·rake railway ramarang baksa nangdimatako man·gnok, indiba Meghalaya a·dokni skotong songjinma Shillong-o railway ramako taribaanichi a·dokona gipin jatrang bang·e napbana kene sinjetgipa dolrangni kenchaksoani a·sel railway ramarang grian dongna baseaha.
Ia bilsini a·bachengao gimik political party-rangni committee-ko songgenchimoba railway-ni bidingo jedakgipa chanchianirangko dakna a·sok sorkari chanchia dongja aro da·ona kingkingba changsaba tom·aniko Committee-ni gita ong·ata dongkuja.
Sinjetgipa dolrang a·dokona gipinoni napbaenggiparangko name dake nina mechanism-ko nangchenggipa ong·e uamang railway ra·baako jechaksoenga.
A·dok sorkari railway-ko Jaintia Hills-ona ra·angna chanchiachim indiba iarangni bidingo changsaba agangrika dongja aro Garo Hills-oni dilgiparang da·o Mendipathar-oni railway-ko Garo Hills-ni ning·o dingtang dingtang biaprangona ra·dapangchina dabiangenga.