TURA: Garo Hills-o aro Meghalaya a·dokni autonomous district council (ADC)-rangko mangrakbatatna gita 2014 bilsio ANVC aro ANVC-B dolrang baksa ma·mong aro a·dok sorkarirangni songgigrikanio soi ka·grikaniko pe·ani a·selan district council-rango namroro silroroanirang dongjaenga aro district council-ko chalaianio neng·nikanirangko chagrongna nangenga ine Robibar attamo, Tura-ni MDC aro BJP-ni state vice president Bernard N Marak, a·dokni Chief Minister Conrad K Sangma-na sedoatenba, GHADC gita Garo Hills-ni namroro silroroanina ma·mong sorkarini chame on·atgipa tangka paisarangko jakkalsretahani ine ta·raken ja·kurangko de·china didiataha.
“ANVC dolrang baksa songgigrikanio soi ka·grikani ja·man 2015-16 bilsirango ma·mong sorkari, Garo Hills-ni namroro silroroanina gong kror 100.71 tangkarangko chamatahachim indiba ia tangkarangko ong·gija dake jakkalsretaha. Chidekgre-o Council Museum-ni pal Tribal Research Centre-ko rikskaaha aro bang·bata project-rangkon matchotgija galaha. Ian ANVC dolrang baksa ma·mong aro a·dok sorkarirangni songgigrikgipa Garo Accord-ni Para 7.6-ko pe·ani ong·a,” ine Marak parakataha.
Ia Garo Accord-ara lekkamangmango soi ka·asan ong·aija indiba Meghalaya-ni aro mongsongbate Garo Hills-ni Tribal manderangna ku·rachakanisa ong·a ine janapatengon, ia songgigrikaniko GHADC EC-ni aro ruling MDC-rangni pe·aniara niam bidikko aro mongsongbate manderangni ka·donganiko pe·anisa ong·aha ine Tura-ni BJP MDC parakataha.
ANVC dolrang, a·dok sorkari, GHADC aro jakgitele audit ka·gipa bimang baksa ta·raken tom·aniko ong·atchina Chief Minister-ko didiatengon, GHADC-na ma·mong sorkarini chamatgipa pilak project-rangko aro tangka paisa jakkalsretanio jak donggipa pilak contractor-rangni kosako sandirokatchina Tura MDC dabiangaha.
Iani bidingo inquiry-ko dakatenba report-ko a·dokni Governor aro sorkarina on·china gitaba Marak dabiangaha.