SHILLONG: Meghalaya a·doko game ge·e cha·enggiparang, bading chiwale cha·giparang aro self help group-rangna dakchakanirangko on·na man·na gita a·dokni food processing sector ba cha·ani tariani karkanarangko bilakbatatna gita pilak nanga dakchakanirangko on·china a·dok sorkari, ma·mong sorkariko didiataha.
Meghalaya a·doko game ge·e man·enggipa ma·manti bosturang, jekai anaros, holdi, e·ching aro komilarang nosto ong·e bon·jana gita dingtang dingtang cholrang, jekai cha·ani tariani karkana, cold storage ba ka·sine rakkiani kolrang aro cha·ani tarigiminko katepani cholrangko a·dok sorkari sandimanaha.
Iani bidingo Meghalaya a·dokni Chief Minister Conrad K Sangma, Union Food Processing Industries Minister Chirag Paswan-ko Robibar salo New Delhi-o gronge agangrikaha.
Iani bidingo an·tangni social media jakkalgipao u·iatengon, “A·dokni game ge·e cha·giparang, bading chiwalgiparang aro SHG-rangko cha·ani tariani kamrango dakchake on·na gita da·al anga Union Food Processing Industries Minister Chirag Paswan-ko gronge agangrikna man·ahani gimin kusi ong·beaha. An·chingni game ge·e cha·enggiparangni man·gipa bosturangko una mesoke on·na anga katchabea. Meghalaya a·dokna uni dakchakanirangko on·engani gimin anga uko mittelpilna ska,” ine Chief Minister Conrad Sangma parakataha.