SHILLONG: Meghalaya a·doko bobil dake chakatgipa dolrang ong·kattaina sienga ine adita salrangna skang, Opposition dolni dilgipa Mukul Sangma-ni agananiko a·dokni Director General of Police (DGP) Idashisha Nongrang-ba ku·chakani ja·man NPP-chi dilenggipa MDA 2.0 sorkario bak ong·enggipa United Democratic Party (UDP)-ba iana jajrengchaksoaniko parakataha.
A·doko bobil dake chakatgipa dolrang ong·kattaina sienga ine jangbingbanganiko name am·sandichina didiatengon, a·doko bobil dake chakatgipa dolrang ong·kattaina man·jana gita chadamberangni nanganirangko chu·sokatna nangengani gimin UDP janapataha.
A·doko bobil dake chakatgipa dolrang ong·kattaina sienga ine jangbingbanganiara a·dokni manderangna jajrengsona nangani ong·enga ine UDP-ni general secretary aro KHADC-o Opposition dolko dilenggipa Titosstarwell Chyne aganaha.
“Ian ong·bebena nanggenchimode an·ching a·doko songdongenggipa pilaknan jajrengsona nangani ong·enga. An·ching sorkariko chalaigiparang ong·e, iara maini a·sel ong·enga, uko name sandina nangenga. Ian chadamberangni nanganirangko aro neng·nikanirangko name nijaengani a·selba ong·ani cholrang donga,” ine Chyne aganaha.
Songsalni pilak manderangnan namroro silroroaniko sokatna man·genchimosa aro chadamberangni nanganirangko chu·sokate on·na man·genchimosa tom·tomanikode rakkina man·aigen ineba ua aganaha.
“Ian namen jajrengna nangani ong·enga. An·chingna tom·tomanikosa nanga, so·sojengjeng ong·anikode nangja. A·doko namroro silroroani donggenchimosa aro chadamberangni nanganirangko chu·sokate on·na man·osa tom·tomanikode man·aigen,” ine UDP-ni general secretary aganaha.
Bobil dake chakatanisan ong·aigija, pekatgipa samrangko jakkalani aro ong·gija kamrangko champengna nanganiba a·doko ra·biani kam ong·enga ineba ua aganaha.
A·doko skia man·gipa adita chadamberang, bobil dolrango napangaha aro skie ra·aniko matchotahani gimin a·doko bobil dake chakatgipa dolrang ong·katbataenga ine adita salrangna skangsan Opposition dolni dilgipa Mukul Sangma, mikrakataniko on·angahachim.
Sangma-ni iandake mikrakataniko on·angani ja·man a·dokni DGP Idashisha Nongrang-ba iako ku·rachake, chadamberangko bobil dolrango rimnapenga ine an·tangni kobor man·soaniko parakataha
“Oe, gital bobil dolko bikottaina gita chadamberangko rimnapenga ine chinga koborrangkode man·soenga indiba badia dolni manderang, badia chadamberangko rimnapna jotton ka·enga, ukosa chinga ma·sikuja,” ine a·dokni Director General of Police (DGP) Idashisha Nongrang parakataha.
Da·o dipet a·doko bobil dolrangko bikottaina jotton ka·enga ine kobor man·enggipani bidingo tale ma·sikujaengoba police-rang, mikrake kamrangko ka·enga ineba ua aganaha.