TURA: Dormaha man·gija ja 43 ong·pilengahani gimin, uamangni man·gnirangko on·china gita GHADC-ni NGEA-ni dabie jingjengatanio bakrimpaaniko mesokna gita A·chik a·songni dingtang dingtang NGO-rang mejalo bakko ra·angaha aro Garo Hills gimikon konta gnina dokkanrangko chiptokaha.
Garo Hills Autonomous District Council (GHADC)-o NGEA Employee-rangni ja 43-ni dormahako man·kujani gimin, uamangni man·gniko on·china dabie jingjengatani da·o sal sotbonga batpilonaba GHADC (EC)-ko chalaienggipaoni maming kobor dongkujaenganina GSU, FKJGP, AYWO, ADE, TGCSU, aro FAF ku·cholsan ong·e jatna re·mikkangenba jingjengataniko dakangaha.
Indake GHADC-o ong·enggipa obostarangni bidingon mnisal attamchibra Tura District Auditorium-o dingtang dingtang giljani manderang tom·chimongenba bi·rimaniko dakangaha aro ia tom·anio Opposition Dilgipa aro a·dokni gitcham Chief Minister, Dr. Mukul M Sangma aro GHADC–ni gipin opposition memborrangba bakko ra·angaha.
NGEA-ni jingjengatanio bakrimaniko mesokna Sombar salo 12 bajioni 2 bajiona konta gnina Garo Hills-ni dingtang dingtang biaprango dokkanrangko chipate jingjengataniko dakangaha.
Unomitingo, a·jao songsalni neng·nikani somoio NGO-rang ku·mongenba, GHADC-o NGEA employee-rangni neng·nikaniko namatchina aro Council-o Finance and Service Rules-ko ra·gatenba, Council-ni ning·o tangka-paisarangko jakkalsretgija jatko re·dilanio dangdike on·china NGO-rang didiangaha.
