TURA: Meghalaya Police Act 2010-ni ning·o Accountability Commission-ko Garo Hills-o songchina didie Garo Hills-ni social activist sakgni, chong·motan Nilbath Ch Marak aro Flaming B Marak, Meghalaya a·dokni Deputy Chief Minister aro Home Minister Prestone Tynsong-na sedoataha.
Social activist sakgnini Deputy Chief Minister-na sedoatani gitade, jabrini gisepon Meghalaya Police Act 2010-ni niamrango pangchake, Accountability Commission-ko songchina gita 2023 bilsini PIL No 7-ni ning·o Meghalaya High Court, a·dok sorkarina ge·etaniko on·ahachim.
Shillong songjinmaode Lokayukta court dongahani gimin ia commission-ko Garo Hills-ni je a·jaoba songchina gita social activist sakgni, a·dok sorkariko didiataha.
GAD-ni a·arang dongani gimin a·arangko bretaina nanggijan Accountability Commission-ko Garo Hills-o songna man·aigen aro iako Garo Hills-ni Nokmarangba kusi ong·e ra·chakaigen ineba social activist sakgni parakataha.
Accountability Commission-ko songanichi chadamberangni kamna neng·nikanirangko namatna man·gen aro ian Garo Hills-na bang·en namgni ong·gen ineba uamang parakataha.
Accountability Commission-ko songaniara Garo Hills-na pattiani gita ong·gen ine janapatskaengon, ia dabianiko ta·raken niatchina Garo Hills-ni social activist sakgni, a·dokni Deputy Chief Minister-ko didiataha.