SHILLONG: Batanggimin chang election-rango chu·sokgipa ong·na man·jagenchimoba Garo Hills-o bang·en manderangni chakpaanirangko man·aha ine re·baenggipa 2026 bilsio ong·atna sienggipa Garo Hills Autonomous District Council (GHADC) election-oba United Democratic Party (UDP) susana gita tarisamsoenganiko parakataha.
UDP-ni general secretary aro KHADC-o Opposition dolko dilenggipa Titosstarwell Chyne-ni aganani gitade, batanggimin chang GHADC election-oba UDP, bewalan candidate-rangko susaatahachim indiba chu·sokna man·jahachim.
“2021 bilsini election-oba chinga bewal seat-rangon susaaha aro ua chang chinga seat ge·sakoba chena man·jahaoba manderangni chingna pu·onanirang bewalan namaha. Garo Hills-o UDP kraa gitan bilakkuenga,” ine Chyne aganaha.
UDP-ni ja·dilrang, APHLC aro HPU dolrangni chasongon Garo Hills-o su·aha ine janapatengon, ian Garp Hills-o UDP-ni mingnamaniko mesokani ong·enga ine UDP-ni general secretary parakataha.
Khasi aro Jaintia Hills-ni party-rang maini a·sel Garo Hills-o dal·rorona man·rongja ine sing·anina aganchakaniko on·angskaengon, “UDP-de APHLC aro HPU-ni chasongonin state party ong·a aro skangonin MLA-rang, MDC-rang donge mikkangchiba dongangkuaigen. Gisepgriko haida adita neng·nikanirang ong·katahakon indiba chinga party-ni gita ia pilak neng·nikanirangkon namatna kam ka·enga,” ine Chyne aganaha.
GHADC election-na gipin party-rang baksa bakrimna miksonganirang dongama ine sing·skaon, iani giminde uamang chanchia dongkuja ine UDP-ni general secretary parakataha.
Constituency-rango ong·enga obostarangko name nipilchina aro badita dam constituency-rango susana nanggen, uarangko recommend ka·china gita UDP-ni central executive committee, Garo Hills-ni dilgiparangna kamko pakwate on·ataha ineba ua aganaha.
“Garo Hills-ni dilgiparang, badita dam seat-rango susana nangnikenga, uani krisa UDP, GHADC election-o susagen,” ine Chyne aganaha.