SHILLONG: 2015-2016 bilsirango Garo Hills Autonomous District Council (GHADC)-na ma·mong sorkarini chamatgipa gong kror 100.71 tangkarangko jakkalsreta ine matnanganirang ong·katahani gimin ua somoio da·o Chief Minister ong·enggipa Conrad K Sangma an·tangan GHADC-ni High Powered Committee (HPC)-ko dilani gimin iani bidingo talataniko on·china Opposition dolni dilgipa Mukul Sangma dabiangaha.
Ia gong kror 100.71 tangkarangko ma·mong sorkari, Garo Hills-o namroro silroroaniko ra·bana gita special grant-ni ning·o GHADC-na chamatahachim.
Mukul Sangma-ni parakatani gitade, ia tangkarangko uni chief minister ong·engmiting somoio GHADC-na watatahachim indiba district council-ona tangka paisarang sokbaani ja·man, ia tangka paisarangko jakkalsretaha ine ma·sina man·aha.
Garo Hills-ni dingtang dingtang dolrang, Right to Information (RTI) ka·e am·sandion, GHADC-o bang·bea tangka paisa jakkalsretaniko ma·sina man·aha ineba Sangma aganaha.
Iandake GHADC-o tangka paisarangko jakkalsretanirang parak ong·ani ja·man uamang kacharini gita sandirokchina dabiaha aro da·o ia case, Lokayukta-o ong·engkua ineba Opposition dolni dilgipa parakataha.
“Ia tangka paisarangni Utilisation Certificate (UC)-rangko India sorkarina changsaba on·chipjahani a·selan ja·man watatna nanggipa tangka paisarang bon·chipaiaha,” ine ua aganaha.
GHADC-na chamatgipa gong kror 100 tangkarangko name jakkala ong·ode ja·mano bilsiantian kror 300 batpile ma·mong sorkari chamatnaba gnangchim ineba ua aganaha.
“Gong kror 100.71 on·atgipa tangka paisarangko name jakkaljahani a·selan da·o district council-rangna ma·mong sorkari tangka paisarangko on·attaina ka·dongjawaha,” ine Sangma aganaha.
Ua somoio GHADC-ni Executive Committee (EC)-ko National People’s Party (NPP)-an chalaidilengachim aro council-o kamrangko nirokna gita HPC-ko songahachim ine janapatengon, ia HPC-ko ua somoio da·o a·dokni Chief Minister ong·enggipa Conrad Sangma an·tangan chairman ong·e dilahachim ine Opposition dolni dilgipa aro a·dokni gitcham Chief Minister Mukul Sangma parakataha.
Gong kror 100.71 tangkarangko koros ka·anio niamrangko ja·rikama ja·rikja aro maini gimin ia case-rang da·onan Lokayukta-o matchotchipgija dongenga, iarangni bidingo talataniko on·china Opposition dolni dilgipa, a·dokni Chief Minister Conrad Sangma-o dabiangaha.