SHILLONG: Garo Hills Autonomous District Council (GHADC)-ni High Powered Committee (HPC)-ko uni dilengmiting somoio ma·mong sorkarini chamatgipa tangka paisarangko jakkalsreta ine Opposition dolni dilgipa Mukul Sangma-ni matnanganiko Mongolbar salo, a·dokni Chief Minister Conrad K Sangma raken jegalataha.
2015-16 bilsirango GHADC-na ma·mong sorkarini chame on·atgipa gong kror 100.71 tangkarangko jakkalsretani somoio da·o Chief Minister ong·enggipa Conrad K Sangma an·tangan HPC-ni chairman ong·e dilengachim ine adita salrangna skangsan Opposition dolni dilgipa Mukul Sangma matnangatenba, ia tangka paisarangko jakkalsretani bidingo talataniko on·china dabiangahachim.
Ia tangkarangko ma·mong sorkari, GHADC-ni ning·o donggipa dingtang dingtang biaprango namroro silroroaniko ra·bana gitasa chame on·atahachim indiba ia tangkarangoni bang·batakon NPP-chi chalaienggipa GHADC-ni Executive Committee jakkalsretaha ine Sangma matnangatahachim.
Iandake matnanganirangko jegalatskaengon, ia tangkarangoni 60 ba 70 percent-kosan India sorkari chamataha indiba ma·mong sorkarioniko man·sogipa paisa pelpraknan hisaprangko rakkie donaha ine Chief Minister parakatskaaha.
“Iandake matnanganiara kakket ong·ja maina ia tangkarangoni 60 ba 70 percent-kosan India sorkarioni watataha aro na·simangni nikenggipa pilak kamrangni utilization certificate (UC)-rangkon on·manaha. Ian kakket ong·ja aro pilak kamrangkon ka·aha,” ine Sangma aganaha.
Ua somoio tangka paisarangko chame on·aniara gipin autonomous district council-rangnaba nangchakea aro mitam council-rang UC-rangko on·anio ja·manchakahani a·selsa ia tangka paisa chame on·ani program dontongna nangaha ineba ua aganaha.
GHADC-ni man·sogipa tangka paisarangko chu·gimikan koros ka·aha aro ia kamrangna see rakkianirangba donga ineba ua a·kangaha.
“Je tangka paisarangkon chinga ua somoio man·soahachim, pilak tangkarangkon koros ka·aha aro ia korosrangni hisaprangko see rakkianiba donga,” ine Chief Minister aganaha.