TURA: Garo Hills Autonomous District Council (GHADC)-o kam ka·enggipa manderangna ja 43-ni dormaharangko on·na man·jaengani gimin aro Garo Hills-o ong·enggipa dingtang dingtang obostarangni gimin Opposition aro Trinamool Congress (TMC) dolni dilgipa Mukul Sangma, National People’s Party (NPP)-chi dilenggipa MDA sorkariko matnangataha.
Mongolbar salo, Purakhasia songo jinma tom·bimonganiko ong·atanio ua, Garo Hills-o ong·enggipa obostarangna MDA sorkariko matnange aganangaha.
Ia tom·bimonganio ua jinmana aganprakengon, GHADC-o tangka paisani gita neng·nikanirangko chagrongna nangengani gimin aro kam ka·giparangna dormaharangko on·na man·jaengani gimin a·dokni Chief Minister aro NPP-ni president Conrad K Sangma-ko matnangataha.
2016-17 bilsirango uni Chief Minister ong·engmiting somoio ma·mong sorkarini GHADC-na chamatgipa gong kror 100.71-ni Special Assistance Package-ni bidingo janapatengon, ia tangkarangko koros ka·ani utilization certificate (UC)-rangko ma·mong sorkarina on·jahani a·sel MDA sorkari, iandake ma·mong sorkarini dakchake on·aniko man·taijaengaha ine Sangma aganaha.
“Ia tangka paisarangni Utilisation Certificate (UC)-rangko India sorkarina changsaba on·chipjahani a·selan ja·man watatna nanggipa tangka paisarang bon·chipaiaha,” ine ua aganaha.
GHADC-na chamatgipa gong kror 100 tangkarangko name jakkala ong·ode ja·mano bilsiantian kror 300 batpile ma·mong sorkari chamatnaba gnangchim ineba ua aganaha.
“Gong kror 100.71 on·atgipa tangka paisarangko name jakkaljahani a·selan da·o district council-rangna ma·mong sorkari tangka paisarangko on·attaina ka·dongjawaha,” ine Sangma aganaha.
Indita tangka paisarangko jakkalsretani case da·aloba Lokayukta-on matchotchipgija dongkuenga ine janapatengon, iandake tangka paisa jakkalsretaniko bon·atna aro mikkangchi GHADC-na bang·bate tangka paisarangko man·bana gita ia case-ko ta·rake matchotatchina Opposition TMC-ni dilgipa didiataha.
Uni Chief Minister ong·engmiting somoion State Finance Commission Act 2012-ko gitcham sorkari pass ka·ahachim ine janapatskaengon, da·o ong·enggipa sorkari, ia Act-ko jakkalchipjaha ba tangka paisarangko ra·chaksona gita committee-koba songchipjaha ine Sangma matnangataha.
Ia Act-ko name ra·gatgenchimode, Union Finance Commission-ni dongimin niamrango pangchake GHADC, ma·mong sorkarini tangka paisarangko man·sona dakchakgnokchim ineba ua aganaha.
ANVC aro ANVC-B dolrang baksa ma·mong aro a·dok sorkarirangni songgigrikanio soi ka·grikgipani gimin janapatskaengon, da·alonan ia songgigrikaniko chu·sokatna MDA sorkari gisiko nange kamko ka·jaenga ine Sangma matnangataha.
Tura Medical College-ko Public-Private Partnership (PPP) mode-o chalaina sorkarini tik ka·engani giminba ua MDA sorkarini kosako matnange aganangaha.