Uni manggisiko Jaiaw Presbyterian Mondolini gopramo gopa
SHILLONG: Re·anggipa Sukrobar walo, Shillong songjinmani Bethany Hospital-o a·gilsakko watanggipa a·dokni gitcham Chief Minister Donwa Dethwelson Lapang-ko Sombar salo gope galna skang, Jaiaw-ni Students Field-o jinma tom·bimonganiko ong·atangenba, bon·kame mande ra·pilskaaniko dakataha.
DD Lapang-na bon·kame mande ra·pilskaaniko dakatanio, a·dokni Chief Minister Conrad K Sangma, Opposition dolni dilgipa Mukul Sangma, Deputy Chief Minister Prestone Tynsong, gipin Cabinet Minister-rang, MLA-rang, dingtang dingtang political dolni dilgiparang, toromko dilgiparang, songsalna kam ka·giparang, nokdangni manderang, aro a·dokni dingtang dingtang biaprangoniba bang·en manderang re·bae bak ra·angtokaha.
Ia tom·bimonganiko ong·atanio, a·dokni Chief Minister Conrad Sangma, jinmana aganprakangengon, indita bilsirangna uni a·dokna aro a·dokni manderangna an·tangko on·kange kam ka·angahani gimin a·dokni gitcham Chief Minister Lapang-ko mittelpilangenba, uni dangdike on·anggipa kamrangni gimin gisik ra·atpilaniko dakangaha.
Lapang sagi, maikai an·tangko onatbee kamrangko a·bachengaha aro maikai saksa dilgipa ong·e a·dokna dangdike on·angaha, uarangni gimin janapangengon, “Uni janggi tanganiara an·tangnasan ong·jaha indiba Meghalaya a·doknasa ong·aha,” ine Sangma aganaha.
A·dokko a·bachengmiting somoirangoni ia gital chasongrangonan ua saksa kim·kime a·dokko dilgipa ong·achim ine janapatskaengon, “Uni kamrangan a·dokna teng·aniko on·gipa gita ong·aha,” ine Chief Minister aganaha.
Lapang-ko uni chonengmiting somoio ma·sibaani gimin janapatskaengon, ja·mano ua Lapang sagi baksa Assembly-o kamko ka·rimna cholko man·e, uni manderangna dangdike on·na ka·oksianiko ua nikaha ine Sangma aganaha.
“Ua saksa bilakbee ku·rang on·na man·gipa aro dingtang dingtang gadangrango a·dokna dangdike on·gipaba ong·aha. Ua Chief Minister, Cabinet Minister, Minister of State, Opposition dolni dilgipa aro dingtang dingtang gadangrango kamko ka·aha. Uni ku·rang on·aniara Assembly-osan gam·aijaha indiba bon·kamgipa ramaonan gam·angaha,” ine Chief Minister Conrad Sangma aganaha.
Uni a·dokna on·gilanggipa kamrangko gisik ra·atpilengon, sorkarini kamrangko mangrakbatatna, chadamberangna dingtang dingtang cholrangko on·na, pilaknan kakket bi·chalko on·na aro bobil dolrang baksa ceasefire-rangna songgigrikanichi tom·tomaniko ra·baana kam ka·aha ine Sangma aganaha.
Lapang-ni rakbee kamrangko ka·anichisa Ri Bhoi aro South Garo Hills a·jarangko man·e on·aha ineba Chief Minister aganaha.
Lapang-ni mingnamgipa kamrangan mikkangchi a·dokni chadamberangna didianiko on·anggen ineba ua aganaha.
Lapang-ni kamrangna aro uni a·dokna on·kanganina mittelpilangskaengon, “Uko gisik ra·aniara an·chingna mikkangchi ramako dilani gita ong·gen,” ine Sangma aganaha.
Ia tom·bimonganiko ong·atanio, Opposition dolni dilgipa Mukul Sangma-ba jinmana aganprakangengon, Lapang-ni ru·utbea bilsirangna an·tangko a·dokna aro a·dokni manderangna dangdike on·angahani gimin mittelpilaniko parakangaha.
Politics-o napna skang ua pangnan Dr Lapang-ni kamrangko ja·rikna sikgipa ong·achim ine janapatengon, 1988 bilsio ua maikai Congress Legislature Party-ko re·dilaha aro bilsi 69 ong·ona kingkingan uni manderangna dangdike on·na ka·oksianirangko Sangma gisik ra·atpilaha.
Lapang saksa an·tang baksa kam ka·rimgiparangko jakkandile re·dilna changgipa mande ong·achim ineba Opposition dolni dilgipa aganaha.
Ia tom·anio jinmana aganprakanggipa gipin manderangara, a·dokni Deputy Chief Minister Prestone Tynsong, gitcham Chief Minister DD Lapang sagini depante B Blah aro gipinrang ong·a.
Tom·a matchotani ja·man Lapang sagini manggisiko, Jaiaw Weiking-o donggipa Jaiaw Presbyterian Mondolini gopramo gopaha.
1932 bilsini April 10 tariko atchigipa DD Lapang, 1972 bilsini Assembly election-o Nongpoh constituency-oni Independent candidate ong·e susaenba, skanggipa changna MLA ong·e seokako man·aha aro indita bilsirangna uni a·dokna dangdike on·anio ua changbrina kingking, Meghalaya a·dokni chief minister-ba ong·ahachim.
1992 bilsioni 1993 bilsini February jao ua skanggipa changna a·dokni Chief Minister ong·aha aro uni ja·man 2003 bilsini March 4 tarikoba ua changsataie Chief Minister-ni kamko jako ra·taiaha. Indake ong·genchimoba ua somoio nangrime rikgipa sorkari meligrikna man·jae ua 2006 bilsini June 15 tariko CM-ni kamko wataha.
Uni ja·man 2007 bilsini March jaoba ua a·dokni Chief Minister ong·e ku·mikchettaiaha. 2008 bilsini Assembly election-ni ja·man ua March 10 tariko CM ong·e ku·mikchetahachim indiba sak 60 donggipa Assembly-o sak 28 membor-rangsan bakrimaiahani gimin ua salskuni ja·manon kamtangko watpilna nangaiaha.
2009 bilsio jagnina Meghalaya a·dokko President-chi sason ka·angani ja·man May-ni 13 tariko DD Lapang, brigipa aro bon·kamgipa changna chief minister-ni kamko jako ra·piltaiaha aro ua 2010 bilsini April 19 tariko kamtangko wataha.
Uni politician ong·e kamrangko ka·anio ua ru·utbea bilsirangnan Indian National Congress (INC)-o kakket ong·e dongaha indiba 2018 bilsini December 10 tariko ua bon·kame, National People’s Party (NPP)-o napskaaha.
NPP-o napani ja·man ua, uni siangaona kingkingan Meghalaya sorkarini Chief Adviser ong·e kamko ka·angaha.