SHILLONG: Meghalaya a·dokni Chief Minister Conrad K Sangma-chi dilenggipa Meghalaya Democratic Alliance (MDA) 2.0 sorkarini Cabinet-ko da·al Mongolbar salni bako sualpiltaigen aro Cabinet-ni gital minister-rang da·al attamni 5:00 bajio, Raj Bhavan-o ku·mikchetanggen.
Kobor on·timgiparangni u·iatani gitade, a·dokni Chief Minister Conrad K Sangma, Sombar attamni 4:00 bajimango a·dokni Governor CH Vijayashankar-ko grongenba, Cabinet-o rimnapna sienggipa MLA-rangni bimingko on·eaha. MDA sorkarini Cabinet-ko sualpiltaianio komibeoba sakchet minister-rang, dingtangnaba gnang.
Koborko on·ani gitade, ia gital Cabinet-o National People’s Party (NPP)-ni minister sakbri, chong·motan Health Minister Ampareen Lyngdoh, Power Minister Abu Taher Mondal, Education Minister Rakkam A. Sangma, aro Food & Civil Supplies Minister Comingone Ymbon-ko galaha aro Ampareen Lyngdoh-ni biapo Jirang MLA Sosthenes Sohtun, Rakkam Sangma-ni biapo Resubelpara MLA Timothy D Shira, Comingone Ymbon-ni biapo Jowai MLA Wailadmiki Shylla aro AT Mondal-ni biapo Dalu MLA Brening A Sangma ba Mendipathar MLA Marthon J Sangma-ko rimnapskanaba gnang.
United Democratic Party (UDP)-oniba Paul Lyngdoh aro Kyrmen Shylla Cabinet-oni ong·kate, uamangni biapo Mairang MLA Metbah Lyngdoh aro Amlarem MLA Lahkmen Rymbui-na biapko on·angskagen. Iako UDP-ni dilgiparang an·tangtangan Sombar salo tom·e chanchirimenba tik ka·angaha.
Bharatiya Janata Party (BJP)-oba Cabinet Minister ong·enggipa AL Hek-ni biapo South Shillong-ni MLA Sanbor Shullai biapko ra·angskagen aro Hill State People’s Democratic Party (HSPDP)-oba Shakliar Warjri-ni pal Mawshynrut MLA Methodius Dkhar, Cabinet-ni biapko ra·skagen.
Da·o dipet BJP aro HSPDP dolgnian Assembly-o MLA sakgnigni donga ine nikna man·a.
Cabinet-ko Mongolbar salo sualpiltaina siengoba, iani bidingo BJP-ni state president Rikman G Momin, Chief Minister-oni u·iataniko man·sojaha ine parakataha.