TURA: Shillong songjinmani Nongrah Nonglum jolo, bilsibri ong·gipa me·chik bi·sa saksako ma·sina man·kugijagipa manderangni ka·saninggija dake so·ote galanina Meghalaya Pradesh Youth Congress (MPYC) raken jegalatenba, mikkangchi iandakgipa a·selrangko champengna man·na gita ja·kurangko de·china a·dok sorkariko didiataha.
Ia bilsibri ong·gipa me·chik bi·sa Insaphira Lyngdoh Mawnai, Robibar pringo, an·tangni nok sambao kal·e roengmitingo gimaahachim indiba Sombar pringo, uni sigimin manggisikosa, apsan gittimon gital rikenggipa nok te·sao, ditdoe dongenggipa mikkachio ro·ongchi onjetdape donakosa man·aiahachim.
Iandake dukni somoio sianggipa bi·sani nokdangna kalimpaaniko parakatengon, iandake dosgri bi·sako, an·tangni noksamon so·ote galna man·aniara manderangna naljokani gri ong·aniko mesokani ong·enga ine MPYC-ni president Timjim Momin parakataha.
“Iandakgipa a·sel ong·aniara da·osan ong·enga ong·ja indiba batanggimin somoirango an·ching Williamnagar aro Rajasimla songrangoba me·chik bi·sa aro me·chikrangna iandakgipa a·sel ong·anirangko nikna man·aha. A·doko bi·sarangna aro me·chikrangna maming naljokani gri ong·aniara a·dok sorkarini manderangna chel·chakaniko on·anio chu·sokgijaniko mesokanisa ong·a. Ia a·selrangna manderang indita jijatokahaoba da·alonan manderangna naljokaniko aro kakket bichalko on·na man·jaenga,” ine Momin parakataha.
Shillong-o so·ota man·gipa me·chik bi·sa aro uni nokdangna kakket bichalko on·na man·na gita ia a·selko ta·raken sandirokchina aro dos dakgipa manderangni kosako rakbatsranggipa sastiko on·china gitaba MPYC didiataha.
Meghalaya a·doko bi·sarangna aro me·chikrangna naljokaniko on·na man·na gita nirok sandianirangko bilakbatatchina aro special child protection unit-rangko songchina gitaba MPYC, a·dok sorkariko didiataha.