Polo-o Cherry Blossom Fest ong·atgipako songdonggiparang namnikalja

SHILLONG: Polo Ground-o Cherry Blossom Festival-ko culture showcase aro tourism-na salani dake ong·ataha, indiba songjinmao songdonggiparangna ka·onanganiko aro dongtogijaniko ong·atgipasa ong·angaha. Songdonggiparang aro manderang, fesstival-ko songjinma jatchio sokachakna sorkarini chanchianiko namnikangjaha.
Festival ong·chakatgipa biapni a·sel salantio janggi tangna krenge kam ka·enggiparangni neng·nikaniko talatangna maming kattan dongjaha ine Shillong-o mongsong songdongkamgipa Ashok Lyngdoh talatangaha. “Songjinmao da·o traffic-na bilonen neng·nikaniko man·enga aro uamang New Shillong-kosa mingsingatna nangachim. Shillong songjinmao indakgipa dal·begipa concert-ko sokachakna Polo-o  jeon salantion manderang janggi tangna kam ka·e cha·enggiparang ua rama gitan re·ruraa indakgipa biaprango ramarang indinba changketa uni indakgipa dal·begipa concert-rangko sokachakna krajachim. Bilsi 70 ong·gipa manderang janggi tangna kam ka·e cha·enggipa re·ruaa. Budepa buchumarang neng·nikanirangko man·a,” ine ua aganaha. Festival-ko ong·atna kragipa biaprangko basena nangachim ine ua agandapangaha. “Polo-o ong·atani pal New Shillong-o ong·atna man·ode uan nambatgipa ong·genchim.”
Tarisamsoanirangko Lyngdoh, nambatsranggijagipa ine talatangaha, “Sukrobar salo anga Guwahati-ona sal 12 bajioni ong·kataha anga highway ramaona kontasa adha somoiko nangaha. Ia manderangko neng·nikatgipa ong·a. Show ong·atako na·simang namnika ong·aia, show-rangko ong·atbo, ian a·dokna bilongen nama indiba New Shillong dakgipa bangbang biap donggiparango ong·atbo, jeon garirangko dona chu·onggipa biaprang donga. Maina Polo-o ong·ata?” ine ua sing·doangaha.