SWGH-ni Noonmati aro Mekdual Adinggre skulrang taridapaniko nangenga

AMPATI: South West Garo Hills a·jao Gare Bokmangre SSA Upper Primary skul nokni obostako nikna man·ani ja·man apsan a·jaon Noonmati Gofrai UP skul aro Mekdual Adinggre LP skul nokrangni obostarangni giminba ma·sie ra·na cholko man·aha.
Noonmati Gofrai UP skulko 1992 bilsio kulichengaha aro ia songara Hajong manderangni songdongbatgipa song ong·e, ia skulo Hajong chatro chatrirang poraibatenga.
Skulni headmaster Martin Hajong-ni u·iatani gitade, ia skulo sak 26 chatro chatrirangna skigipa sakbri skie on·enga indiba ia skul nokko 2022 bilsio mikka balwa nosto ka·angaonin neng·nikanirangko man·na a·bachengaha.
“Ia UP skulni wilwilao dam 7 LP skulrang dongani gimin ia LP skulrango poraienggipa bi·sarang, chubata gadango poraidapangkuna gitade ia skulon poraitelnan nangao ga·aka indiba da·o ia skul nok obosta namsrangjahani giminan ma·a paarang an·tangtangni dedrangko gipin biaprangonasa rimange poraiattokengaha,” ine Hajong aganaha.
Ia skulara, Mahendraganj constituency-ni MLA Sanjay A Sangma-ni ning·o donggipa skul ong·a.
Hajong-ni aganani gitade, ia skulara adhoc skulsa ong·ani gimin skigiparangni dormahana agrede gipin kamrangna sorkarini tangka paisani gita dakchakanirangko man·rongja.
Ia skul nokkoba election-na polling station dake jakkalenga ine janapatengon, ia skul nokko rike on·kujaskalde uamang administration-ni kamrango bakrimjawaha ine skigiparang parakataha.
“Skul noko nokkingan dongjaode maikai bi·sarang ia skulo poraina re·bagen? Skulo nokkingan dongjani a·sel chinga nangchongmotgipa lekkarangko aro bi·sarangni ki·taprangkoba name donan man·jaenga. Mikka waahaode chinga skul chutti watana agre maming chol dongja,” ine skulni headmaster aganaha.
Hajong-ni parakatani gitade, ia skul nokko rike on·china gita uamang dingtang dingtang official-rangona aro sorkarini dakchakanikoba bi·ahachim indiba ia skulara adhoc skulsa ong·ani gimin sorkariba dakchakanirangko on·na gisik nangjaenga.
Skangode ia skulo sak 50-na baten chatro chatrirang poraiachim indiba skul nok nosto ong·aonin ia skulo poraigipa chatro chatrirang namen komiaha ineba ua aganaha.
“Chinga DSEO, Deputy Commissioner aro chingni MLA Sanjay Sangma-koba gronge, chingna dakchakaniko on·china mol·molaha. Ia skul nokko bilsi gipino rike on·gen ine ua 2023 bilsio ku·rachakachim indiba rike on·chipjani gimin chinga uko grongtaion, da·o bilsi gipino rike on·skagen ine ku·rachaktaiaha. Iandake maming dakchakanirangko man·chipjaengani a·selan chinga ka·dongani gri ong·na nangaiengaha,” ine skulni headmaster aganaha.
Mekdual Adinggre Govt aro Non-Govt LP skulrangni obostaba apsanaia ine nikna man·aha.
Ia skul damgni, apsan barion donga aro ia skul damgnini obostarangba namsrangjaha.
Jolo songdongenggipa manderangni parakatani gitade, non-government LP skulko pring 7 bajioni pring 11:00 bajiona ka·enga aro ia skulo pilak class-rangkon nokking grigipa kuturi ge·saon ra·dimna nangenga.
Government LP skul nokni obostaba namsrangjaha aro ia skul nokko galchipe dona gitasa nikaiaha.
Ia skulni bidingo education department-ni mitam manderango sing·sandion, ia skul nok namsrangjahani gimin gipin biapona apjitatchengaha ine parakataha.
Ia skul nokko rikna gita tangka paisarangko chame on·manaha aro kamrangk ta·raken a·bachengnaba dongaha ineba ua parakataha.
Ia skul nokko da·o JJM-ni bosturangko donchakna gita contractor-rang jakkalskaenga ine kobor on·aha.