CHOKPOT: South Garo Hills a·jani Chokpot Sub-Division ning·o donggipa Paromgre songo, Georgeman S Marak minggipa mandena mining licence on·aniko Chokpot jolni NGO-rang aro jolo songdongenggipa manderang jegalgrimtokengon, ia songo a·ningni gamrangko uamang maming dakeba bikotna on·jawa ine parakataha.
Ia songo a·ningni gamrangko bikotengani gimin songni manderang baksa agangrikon, ia songo koela bikotna gita licence man·gipa Georgeman Marak, songona re·baani ja·mansa songni manderang, ia biapo koela bikotna a·a palani bidingo ma·sina man·aha ine parakattokaha.
“Scientific mining-ko dakna sienga ine unosa chinga ma·siaha indiba badia Nokma ia biapo scientific mining-na a·arangko palaha ba NOC-ko on·aha, ukode chinga ma·sija. Ia bilsini June jao chinga ia songona re·bae niani ja·mansa, ia biapona uamang koela bikotani ostrorangko ra·baaha ine chinga nikeaha. Ia songni buring bolgrimrangko o·e galenba uamang ramarangkoba tarimanaha. Uamang ia songo apsan daken a·ningni gamrangko bikotangkua ong·ode mikkangchi ia jolrango donggipa pilak bol-wa·arang aro buringrangba dongsrangjawaha aro chiring chibisikrangba tipchangtokgnok. Ia buring bolgrimrango donggipa do·o mat aro matburingrangba gimatokgnok, uni gimin chinga je cholchiba ia songo a·ningni gamrangko bikotna on·jawa aro raken champenganirangko dakangkuaigen,” ine songni manderang aro Chokpot jolni NGO-rang parakataha.
Koborko on·ani gitade, ia songo koela bikotna gita songni Nokma Comet N Sangma, Georgeman Marak-na a·arangko palaha aro da·o songni manderangsan ong·aigija uni nokdangni manderangba uni kamko jegale, Nokmako ra·galchina gita dabina a·bachengtokaha.
Ia Paromgre song samba jolrango mingsinggipa biaprang aro chiring chibisikrang, jekai Dombe Wari, Wari Chora, Rongdik chiring, Kakija chiring aro gipinrangba donga aro ia songo, a·ningni gamrangko bikotangkuaia ong·ode ia pilak biaprangan nosto ka·ako man·tokgnok aro chiring chibisikrang tipchange, songni nokni manderang neng·nikanirangko chagrongna nangtokgnok ineba songni manderang parakataha.
Iani bidingo songni manderang, South Garo Hills a·jani Deputy Commissioner, Chokpot Civil Sub-Division-ni SDO, GHADC, Forest aro Wildlife Division-naba badi ka·e sedoataha ine u·iataha.
“Koela bikotenggipa biapona chinga re·ange, nanggipa lekkarangko am·sandion uamango Nongalbibra-ni Dajugittim-o koela bikotgipa lekkakosa mesokna man·aiaha indiba ia songo koela bikotna on·gipa lekkakode mesokna man·jaha. Iako chinga raken jegalenga aro mikkagchiba raken jegalangkuaigen. Ia songo maming dakeba a·ningni gamrangko bikotna chinga on·jawa,” ine Garo Students Union (GSU) Chokpot regional unit-ni president Jish Sangma parakataha.
