SHILLONG: Re·baenggipa 2028 bilsini Assembly election-o United Democratic Party (UDP) bilakbate susagen aro 2023 bilsiona bate seat-rangko bang·bate chena man·gen ine UDP-ni president aro a·dokni Cabinet Minister Metbah Lyngdoh a·kangataha.
“Chinga namen ka·dongenga aro ia ka·donganion re·mikkangenga. 2023 bilsini Assembly election-o chinga bewalan seat-rangko baridapatna man·aha aro 2028 bilsiode iana bateba chinga seat-rangko chena ka·dongenga,” ine Lyngdoh aganaha.
Meghalaya a·doko joltangni party-rang mingsingbatengahani gimin ia pangchakanio UDP, nambate dakna ka·dongenga ineba Lyngdoh parakataha.
“Regional party-rangna cholko aro daito nambate on·na manderang ma·siengaha ine anga ka·donga,” ine UDP president aganaha.
Re·baenggipa bilsio ong·atna sienggipa Garo Hills Autonomous District Council (GHADC) election-ni bidingo janapatengon, ia election-o susaaniko party-ni gita da·o dipet name chanchikujaenga ine Lyngdoh aganaha.
“GHADC election-nade chinga Garo Hills-o dolsa dilgiparang donga aro da·o dipet uamang chingna bon·kamgipa report-ko on·kuja. Indiba GHADC-ni adita seat-rangode chinga candidate-rangko susaatnaba gnang,” ine UDP president aganaha.
Re·baenggipa antirangosa GHADC election-ni bidingo party-ni dilgiparang nambate chanchinaba gnang ine Lyngdoh parakataha.
