MENDIPATHAR: Robibar salo, skanggipa changna North Garo Hills a·jao donggipa Mendipathar Railway Station-oni koelarangko rel gario watataha aro ian Meghalaya a·dokna gisik ra·ani salba ong·aha.
Ia koelarangko, West Khasi Hills a·jani Shallang-o donggipa koela a·damoniko, Rongjeng, Songsak, Soksan rama gita Mendipathar Railway Station-ona ra·baaha aro ia koelarangko skanggipa changna rel gario, a·songni gipin biaprangona watataha.
Kobor on·ani gitade, koelarangko bol 270 truckrango salbae, rel garini ge 42 rake-rangko gatenba, Robibar attamni 8:30 bajimango, India a·songni skotong New Delhi-ona watataha.
Skanggipa bako, gimik metric ton 2500-mangni gita koelarangko watataha.
Ia koelarangko, Mendipathar-ni MLA Marthon J Sangma, Mendipathar Railway Station-oni flag off ka·ataha.
Meghalaya a·dokni koelarangko skanggipa changna rel gario watatna man·ahani gimin an·tangni kusi ong·aniko parakatengon, mikkangchiba ia railway station-oni bang·en koelarangko watatkuna sienga ine iandakgipa kamrangchi a·dokna bang·en namgnirangko ra·bana sienga ine Sangma aganaha.
“Ia koelarangko niamo pangchakesa railway station-ona salbae, da·o ia koelarangko a·songni skotong songjinmaona watatenga. Ia koelarangko West Khasi Hills a·jani niam gita chalaienggipa quarry-onikosa truck bolprakon metric ton 9 ka·e salbaaha. Koelarangko rel gario watatanio sorkari, pilak niamrangkon ja·rikaha aro da·o ia koelarangko watatani chu·sokgipa ong·ahani gimin chinga pilakan kusi ong·a,” ine Mendipathar MLA aganaha.
Koelarangko salna gita rel garirangko jakkalanichi Meghalaya a·doko, niam gita koela bikotenggipa pilak manderangnan dingtanganiko ra·bana sienga ineba Sangma aganaha.
“Koelarangko truck garirango salanide Assam-onamangmangba bang·en korosrangko aro somoirangko nanga aro pilak nangchongmota lekkarang donggenchimoba neng·nikanirang bang·en donga. Koelarangko salna gita rel garirangko jakkalaniara, koela bikotenggiparangni korosrangko komiatasan ong·aigija Meghalaya a·dokni koelarangko bang·en komiatgnok,” ine Sangma aganaha.
Mendipathar MLA-ni parakatani gitade, niam gita bikotenggipa koelarangko rel garirango salanichi ian sorkari aro a·dokna kajinarangko man·anio bang·en namgnirangko ra·baan baksana District Council-rangnaba namgni ong·gen.
“Rel garirango koelarangko watanichi Indian Railway-ba bang·en namgniko man·gen. Skangode rel garirango gipin biaprangoni bosturangkosa salbarongaiachim indiba da·ode a·doko niam gita bikotenggipa koelarangko rel garirango gipin biaprangonaba watna man·engaha,” ine Sangma aganaha.
