TURA: Garo Hills Autonomous District Council (GHADC) election-o susana gita Scheduled Tribe (ST) certificate-ko nangtelgipa ong·atani bidingo chanchirimna gita GHADC-ni special session-ko re·baenggipa March-ni 23 aro 24 tarikrango ong·atna tik ka·aha.
GHADC-ni special session-ko ong·atna gita Meghalaya sorkarini District Council Affairs (DCA) department-oni u·iataniko man·soani ja·man ia special session-ko March-ni 23 aro 24 tarikrango ong·atna tik ka·e donangaha.
GHADC election-o susagiparang ST certificate donggiparang ong·na nanggen ine u·iataniko on·anio gitcham CEM Albinush R Marak, Executive Committee aro Council-ni kosako re·badee, an·tangni skani gitasa u·iataniko on·aha ine matnangatenba, NPP aro TMC-ni membor-rang, uni kosako No-Confidence Motion-ko dakna tik ka·ahachim indiba motion-ko ra·gatna skangan gitcham CEM, kamtangko watangani ja·man gital CEM-ko seokskaahachim.
Indake ong·engon, gital Executive Committee-ko songaoni GHUA-ni skanggipa tom·aniko Bristibar salo ong·atangaha aro ST certificate-ni bidingo chanchirime resolution-ko ra·na gita special session-ko ong·atna manchiangaha.
Special Session-ko March 23 tarik pring 11:00 bajioni a·bachenge salgnina, District Council Hall-o ong·atanggen.
