TURA: Bilsiantian Easter-ni salko manianio churing chupeke aro chiringrango roe ma·manti dake a·sel ong·anirangko nikna man·rongani gimin ia salko manianio an·tangtangna simsake manichina gita West Garo Hills a·jani Deputy Commissioner, manderangko mol·molataha.
Easter-ni salko kusi ong·e manianio maming a·selrangko chagrongna nangjana gita ua dingtangmancha adita ku·pattianirangkoba on·ataha.
Picnic-rangko cha·engon churing chupekanirangko dakjachina, mikkarang wagenchimode chiringrango jroe rojachina aro man·a dipet chiringrangoni komibeoba metre 50 chel·ao cha·china gita Deputy Commissioner didiataha. Dal·dalgipa ro·ongrango picnic-rangko cha·jachina gitaba DC didiataha.
Jinma kusi ong·e picnic-rangko cha·engon, samtangtango jabolrangko ong·atjana gita aro maming nangchakeanirangko ra·bajana gita plastic-ni plate, cup aro uandakgipa bosturangko jakkaljachina DC u·iataha.
Picnic-chi je bosturangkon ra·angengachim, picnic cha·chakgipa biaprango maming jabolrangko galbagija pilak bosturangkon an·tangtang baksa ra·bapilchina gitaba DC u·iataha.
Picnic cha·chakgipa biaprango agre jangdugae gitrangko watjachina aro saksa sakgipinko mande ra·grikchina gitaba West Garo Hills a·jani Deputy Commissioner mol·molataha.
Gari gorarangko salengon, ta·rake saljachina aro gari gorarango nangana bate manderangko gatjachina gitaba Deputy Commissioner u·iataha.
“Hai an·ching Easter-ko kusi ong·e, simsake, samtangtango ong·telaigiparangko aro saksa sakgipinko mande ra·grike manina,” ine Deputy Commissioner didiataha.
