WILLIAMNAGAR: East Garo Hills Do·bu jolo Jio network namsrangjaengani gimin nirokatchina NGO-rang jedake AHAM,GSU aro ADIL dolrang Deputy Commissioner-na sedoata. Uamangni seatgipa chittio janapangani gitade Do·bu jolo maming dakgijan Jio Mobile aro Internet service namsrangjaenga call ka·na man·ja, Internet ka·sina, Service dongsimja. Mikka-balwa dongahaode bijolirang dongjae chu·gimikan network dongsrangja ine janapaha. Ia jolo jio jakalenggiparang uamangni bill-ko jaantian gamengachim indake ong·genchimoba company-ni nirok simsakani dongjani a·sel apsan daken netwok internet service ia jolo jakaltogipa ong·jaenga ineba janapangaha.
Jolo songdongenggipa adita manderangni badi ka·engani gitade Do·bu jolna Jio authority-rangni internet service-rangko wata tik ong·jaengani a·sel chatro chatrirangna, badingchiwalenggipa, sorkario kam ka·enggipa aro ramram manderangna nanganirangko agangrikna aro dingtang dingtang internet-ni kamrangko ka·anio neng·nikaniko man·enga ineba NGO-rang aganangaha.
Garo Hills-ni gipin biaprangode Jio 5G Network-ko jakalpilenga ine janapatskaengon, Do·bu jolode da·alona kingkingba 4G ong·e dongengkua ine aganangaha.
Unigimin Do·bu jolo Jio jakalenggiparangna internet-na maming neng·nikani gri jakalna man·a gita neng·nikanirangko nirokatchina ine Deputy Commissioner-ko mol·molatengon, Do·bu Jio Sevice-ni in-charge-ko network namsrangjaengani a·selko talate on·china, Do·bu jolna Jio network wataniko nipiltaie namatpilchina ge·etaniko on·china, Petrol/Diesel rangko bon·changjana gita nangchongmotani somaio jakalna gitchae ra·bae on·china ine NGO-rang didiangaha.
