SHILLONG: 2016 bilsio pass ka·gipa Meghalaya Residents Safety & Security Act (MRSSA)-ko ta·raken ra·gatchina aro Umling baksana Ratacherra-o facilitation centre-rangko kulienba District Task Force (DTF)-rangko songe on·china Khasi Students Union (KSU) dabiangaha.
MRSSA-ko ta·rake ra·gatjagenchimode bilakbate jingjengatanirangko dakanggen ineba KSU mikrakataniko on·angaha.
Iani bidingo kobor ra·timgipa manderang baksa agangrikengon, a·dokona niam gri napsrukbaenggipa manderangko champengsona man·na gita Umling aro Ratacherra-o facilitation centre-rangko ta·raken chalaina nangenga aro MRSSA-ni ning·o u·iatgimin pilak DTF-rangko ta·raken kam ka·atna nanga ine KSU-ni general secretary Reuben A Najiar aganaha.
Iani bidingo KSU, a·dok sorkari baksa agangrikchenggen indiba a·jatangtango DTF-rangko kam ka·atna gita pilak deputy commissioner-rangkon didianggen ine ua aganaha.
MRSSA-ko 2016 bilsion pass ka·ahaoba da·o bilsi 10 ong·pilahaoba ia niamko chu·gimik ja·rikkujaenga ine janapatengon, KSU-ni jingjengatanirangko dakahani giminsa ia Act-ni mitam niamrangko da·o ja·rikenga ine Najiar aganenba, ia Act-ko chu·gimik ja·rikkujaskal, KSU sorkario dabiangkugen ine parakataha.
KSU-ni parakatani gitade, ia MRSSA-ara, Meghalaya a·dokona re·baenggipa manderangko champengsona miksonge ra·gatgipa niam ong·ja indiba ian a·dokona re·baenggipa aro re·ongkatangenggipa manderangko see rakkigipasan ong·aia. MRSSA-ko ra·gatanio Meghalaya High Court-ba maming champenganirang dongjachim ineba Najiar aganaha.
A·bachengo facilitation centre kulina manchigipa Umling-o food court-ko kulina gita miksonganirang donga ine sorkarini kosako matnangenggipani gimin janapatengon, a·dokona re·baenggipa manderangko see rakkie donna miksonggipa nokko, bading chiwalram dakna miksongengani gimin KSU-ni general secretary, a·dok sorkariko sing·doataha.
RTI ka·e ma·sina man·gipani bidingo janapatengon, a·doko Inner Line Permit (ILP)-ko ra·gatchina gita a·dok sorkari, 2019 aro 2020 bilsirango ma·mong sorkarina sedoatahachim ine Najiar parakataha.
MRSSA-de ILP gita kamrangko chu·sokatna man·jawa indiba a·doko ILP-ko ra·gatkujaskal MRSSA-ko ja·rikskana nangenga ineba KSU-ni general secretary parakataha.
