TURA: South Garo Hills a·jani Siju jolrango songdongenggipa manderangna sanna bananirangko on·enggipa Siju primary health centre (PHC)-ni obosta namsrangjaengaha ine Garo Students Union (GSU) Siju regional unit parakatenba, jolo songdongenggipa manderangni namgnina ia PHC-ko ta·raken taripile on·china dabiangaha.
Iani bidingo South Garo Hills a·jani District Medical & Health Officer (DM&HO)-na sedoatengon, ia PHC-ona GSU-ni dilgiparang re·ange nion, ia PHC-ni obosta namsranggijaniko nikna man·aha ine GSU Siju unit-ni dilgiparang parakataha.
“Skangonin ia PHC-an jolo songdongenggipa manderangna sanna bananirangko on·engachim indiba da·o ia PHC-ni obosta namsrangjaengahani a·sel saenggipa manderangna sanna bananirangko on·anio bang·a neng·nikanirangko chagrongna nangengaha,” ine GSU Siju unit-ni dilgiparang parakataha.
Ia PHC-ni mongsonggipa building baksana kam ka·giparangni dongchakenggipa quarter-rangkoba taripile on·na nangengaha ine janapatengon, jolo songdongenggipa manderangni namgnina ia PHC-ko aro PHC-ni quarter-rangko ta·raken taripile on·china South Garo Hills a·jani DM&HO-ko didiataha.
