SHILLONG: Cha·bokgipa aro man·e cha·gipa politician-rangni, party-ona napbaani ja·man UDP, uamangni chanchianirangko rongdilengatengaha ine gital seokako man·gipa Meghalaya Pradesh Congress Committee (MPCC) president, Vincent H. Pala, UDP-ni kosako inchakaha.
Uni aganani gitade, Bindo Mathew Lanong aro Jemino Mawthoh gita dakgipa UDP-ni dilgipamancharang, party-o uamangni mikkangrangko ka·sin ka·sin gimatangengaha.
“Skango UDP-ko dilgiparangni kakket ong·aniko chinga pangnan mikchaa ba miknapako man·a. Uamangoni Bindo Lanong-ba saksa ong·a, jean party-o ru·ute dangdike on·enga aro da·alonaba UDP-on kakket ong·e dongengkua,” Pala chanchianiko parakaha.
Bilsi gittam adhana a·doko sasonni bilko man·jaon Congress namen bingbrangatako man·aha ine UDP dilgiparangni agangipana aganchakengon, indakgipa kattarangko agananiara, UDP-o dongkamgipa dilgiparangni gisepo bingbranganiko mesoka ine MPCC president aganaha.
“Anga namen ma·siatna man·enga je, indakgipa cha·bokgipa aro man·e chakgipa politician-rangi, party-ona re·bae uamangchin party-ko dokkol ka·engani gimin UDP-ni dilgiparang manchade kusi ong·tokjaenggen. UDP-de da·o ru·utgijan badinggipa party gitasa ong·aignok” ineba Pala aganaha.
