TURA: Garo Hills Autonomous District Council (GHADC)-ni project mingsana gong kror gittam batpile tangkarangko oke ra·ani ja·manoba ia kamko jako ra·gipa contractor, chong·motan Chief Minister-ni boningtang, kamko matchotatja ine ma·sina man·aha.
Re·anggipa Mongolbar salo, GHADC-ni session-ko ong·atanio, ma·mong sorkarini chamatgipa tangka paisarangchi Members hostel-ko rikani bidingo Opposition Congress dolni MDC Cherak W Momin-ni sing·anina Civil Works-ni Executive Membor talate on·angani ja·man, iako ma·sina man·aha.
GHADC-ni session-o Congress dolni sing·doani aganchakaniko on·angengon, ia kamko 2016 bilsio Sanjay A Sangma-na on·ahachim, ia kamna chamgimin korosara gong 6,01,31,000/- (kror dok laksa hajal kolatchisa) ong·achim aro ia kamko matchotatna gita bilsigni somoiko donsoahachim ine Civil Works-ni Executive Membor talate on·angaha.
Ia kamko jako ra·e ka·gipa contractor Sanjay A Sangma-ra, Chief Minister Conrad K Sangma-ni boninggipa aro Power Minister James K Sangma-ni jongsarigipa ong·achim. 2018 bilsini Assembly election-o ua Mahendraganj constituency-oni NPP tikito susaahachim indiba chu·sokgipa ong·na man·jahachim.
Ia members hostel-ko rikani da·o bilsi bonga batangpilengahaoba kamrangko da·onan matchotkujaengachim aro taridapanirangkoba nikna man·jaengahachim.
Ia project-na chamgimin tangka paisarangoniko baditako Sanjay A Sangma-na on·manaha ine sing·on, kamrangko matchotkujaengoba 60 percent-ko, chong·motan gong 3,60,78,660/- (kror gittam lak sotdok hajal sotsnichet ritchadoksotdok) tangkarangko ua oke ra·manaha ine EM, council-na parakataha.
Ia kamrangna agreba, GHADC session-ni gnigipa salo dingtang dingtang kamrangni giminba opposition Congress dol sing·dona tarisoahachim indiba unsalo mingdok kamrangni giminsan chanchirimna man·aiaha ineba Congress dolni membor-rang u·iataha.
