TURA: Ia bilsioba gnigipa changna COVID-19 giproroahani a·sel skulrango class-rangko ra·na man·jahani gimin mikkang bilsini Board porikkako sena sienggipa chatro chatrirang neng·nikanirangko man·gen ine Garo Hills Deficit School Teachers’ & Employees Association (GHDSTEA) parakatenba, ia Board porikkani syllabus-ko bakkandikatchina gita a·dok sorkariko didiataha.
Iani bidingo Meghalaya a·dokni Education Minister Lahkmen Rymbui-na sedoatengon, a·dokni bang·bata skulrangon online gita class-rangko ra·genchimoba songadam nokadamrangode network-rang namjae aro mitam ma·a paarangde detangtangna smart phone-rangko ra·e on·pana chol ong·jae, bang·a chatro chatrirangan an·tangtangni gamchatbegipa class-rangko gimaatna nangaha ine skigiparang parakataha.
“Re·anggipa bilsioba COVID giproroahani a·sel class-rangko ra·na man·jahani gimin board porikkana syllabus-ko bakkandikataha aro ia bilsioba apsan obostakon chagrongna nangahani gimin chatro chatrirangni namgnina board porikkani syllabus-ko bakkandikatchina chinga mol·molenga,” ine GHDSTEA parakataha.
Board porikkana chu·gimik syllabus-ko ra·genchimode bang·bata chatro chatrirangan chu·sokgipa ong·janaba gnang aro bang·a chatro chatrirangan poraianirangko watgalnaba gnang ine an·tangtangni suk ong·gijaniko parakatengon, iandakgipa obostarangko nie mikkang bilsini Board porikkana syllabus-ko bakkandikatchina ine skigiparang, a·dok sorkariko didiataha.