SHILLONG: Meghalaya a·doko aro mongsongbate Khasi-Jaintia Hills a·jarango bilakbapiltaina jotton ka·enggipa Hynniewtrep National Liberation Council (HNLC) bobil dolko chu·gimik bon·atsrangna gita sorkari kamko ka·enga ine a·dokni Chief Minister Conrad K Sangma parakataha.
HNLC bobil dolni, minister-rangna aro MLA-rangna tangka dabiani lekkarangko on·gipani bidingo janapatengon, ua an·tangde iandake tangka dabie seatgipa chittirangko man·soa dongkuja indiba tangka dabiani chittirangko man·sogipa gipin manderang donga ine Chief Minister parakataha.
Sangma-ni parakatani gitade, adita salrangna skang, Shillong songjinmani NPP office sambao IED bomako donanggipa mongsonggipa manderangko police-rang rim·na man·aha aro adita salrangna skangsan HNLC bobil dolni saksa mongsonggipa membor-ba an·tangko sorkarina bame on·eaha.
“Police-rangba rakbee kamrangko ka·enga aro chingaba HNLC-ko bon·atna kam ka·engaha. An·ching uamangko bobil dol ine aganna man·jawa, uamangara tangka gildrae ra·giparangsa ong·aia,” ine Chief Minister aganaha.
HNLC bobil dolni manderangna sorkari, contract-rangko on·e bilake dongna dakchakenga ine matnanganikoba ua raken jegalataha.
“Uamangoni an·tangtangko register ka·e kam ka·enggiparang dongengnaba gnang indiba ia manderangna sorkari, contract-rangko on·e dakchakenga ine agananide ong·ja,” ine Sangma aganaha.
Indake ong·genchimoba, silchidare keaniko watgale tom·tomaona re·bapilenggipa manderangna dakchakanirangko on·aniode maming gualani dongjawa ineba ua parakataha.
