TURA: Meghalaya a·dokko Khasi-Jaintia aro A·chikrangna bak ka·e on·china gita Hill State People’s Democratic Party (HSPDP) aro Garo Hills State Movement Committee (GHSMC) nangrime dabiengon, dingtang Garoland a·dokna dabianio Bharatiya Janata Party (BJP)-ni bakrimaniko nangjawa ine Mongolbar salo, da·o dipet Garoland a·dokko dabidilenggipa Garoland State Movement Committee (GSMC) parakataha.
Meghalaya a·dokko bak ka·china dabianiara badiaba political dolrangni dabianisan ong·na nangja indiba a·doko songdongenggipa manderangni nangnikaniba ong·na nanga ine adita salrangna skangsan BJP-ni state vice president aro Tura-ni MDC Bernard N Marak janapatenba, a·doko songdongenggipa manderangan bak dakaniko nangnikjaenga ong·ode manderangni kosako kamko ka·na nangja ine ku·pattianiko on·angahachim.
Meghalaya a·dokko bak ka·china dabianiko BJP jegalenga ong·ja aro iako namnikpaengaba ong·ja indiba a·doko songdongenggipa manderangni nangnikanikoba ra·na nanga ineba Marak parakatahachim.
Indake ong·engon, chengonin Meghalaya a·doko songdongenggipa A·chikrangde dingtang dingtang gadango dingtang a·dokna dabienga aro da·oba ia dabianiko watgalkujaenga ine GSMC talatangenba, ia dabianio BJP dolni dilgiparang bakrimaniko on·jagenchimoba dabianikode watgaljawa ine parakatskaaha.
“Chinga Garoland-na dabianio BJP-ni bakrimaniko bi·aba dongkuja aro bakrimanikoba nangjawa. Garoland a·dokna A·chikrangni nangnikaniko agangenchimode A·chikrangni ka·tong ning·o dokanian sakkina bata. Garoland a·dokna politician-rangoniko kakket kam ka·gipakosa nangenga,” ine GSMC-ni ku·wattimgipa Ryan Ch Marak parakataha.
