SHILLONG: Salgro salaram jolrango donggipa political dolrang, Delhi-ona bi·amna re·ange ma·mong sorkarini on·atenggipa man·gnirangko an·tangtangsa cha·skaenga ine BJP-ni national vice president aro Meghalaya a·dokni in-charge M Chuba Ao-ni agangipa kattarangko Robibar salo, Meghalaya a·dokni Chief Minister aro NPP-ni national president Conrad Sangma jegalatskaenba, ian Ao-ni joltango donggipa manderangko chonnikani gitasa ong·aha ine parakataha.
A·songni gita biming donggipa a·dokni political dolrang, New Delhi-ona bi·amna re·angronga ine Sonibar salo, BJP-ni dilgipa M Chuba Ao matnange aganahachim ine nikna man·a.
“Ia regional party-rango mingsa dakbewal gnang aro uan New Delhi-ona bi·amna re·angani ong·a. Re·bapilani ja·man uamang maiko dakronga pilakan ma·sia,” ine Ao aganahachim.
Indake ong·engon, Ao an·tangan saksa salgro salaram joloni ong·eba iandakgipa kattarangko aganaha ine Meghalaya a·dokni Chief Minister, suk ong·gijaniko parakatskaaha.
“Maini gimin ua iandakgipa kattarangko aganaha anga ma·sija indiba ua an·tangan salgro salaram joloni ong·achim. Salgro salaram jolrango mai dake kamko ka·a ua an·tangba ma·sigipa ong·achim. Uni iandake agananiara namen kragijani ong·aha,” ine Robibar salo, NPP-ni national president, kobor ra·timgiparangna aganaha.
A·dokrangona bang·bata tangka paisarangan ma·mong sorkarionisa re·baenga aro dingtang dingtang scheme-rang baksana kajinarangba ma·mongni kajinarangonisa sokbaenga ineba Sangma aganaha.
“Iandakesa India sorkari kamko ka·a aro Finance Commission-ba iarangni gimin kamko ka·enga,” ine Sangma parakataha.
Meghalaya a·dokna ma·mong sorkarini on·atgipa tangka paisarangko maming kamrangnan jakkaljaha ine Ao-ni agangipa kattarangkoba a·dokni Chief Minister raken jegalataha aro a·doko ong·enggipa kamrangko an·tangan re·bae niechina gita didiataha.
MGNREGA-ni kamrangko ka·enggipani gimin janapatengon, skangode a·dok sorkari gong kror 600-mangkosan koros ka·aiachim indiba da·ode ia sorkari, MGNREGA-na gong kror 1500-na baten koros ka·engaha ine Chief Minister parakataha.
“Da·alo chinga MGNREGA-na gong kror 1500 batpilen koros ka·enga aro ian 100 percent-na batpile bariangaha. NRLM project-rangkoba niatgenchimode skango an·chingo gong kror 10-kosan koros ka·aiachim indiba da·alo chinga gong kror 100-na batpile koros ka·engaha,” ine Sangma aganaha.
“Uni gimin ua (Ao) name sandichenggijasa skatang kattarangko aganenga ine anga chanchia. Ua politics-ni gitasan iandakgipa kattarangko aganenga,” ineba ua aganaha.