Kolkata: (PTI) BJP-ni kosako West Bengal Chief Minister Mamata Banerjee-ni re·chakkatdilgipa dolona re·baenggipa salrango bang·arangan re·bakugen ine Meghalaya Trinamool Congress dilgipa Mukul Sangma Mongolbar aganaha.
Meghalaya-ochanggnina chief minister ong·gipa gitcham CM Mukul Sangma, jean gipin sak 11 MLA-rang baksa, TMC-ona napangani ja·mano TMC Ma·dot Mamata Banerjee-ko Kolkataona re·ange grongeahachim, mikang sal 45-ni gisepo TMC flag-rang janggnok ine ua aganaha.
TMC headquarters Kolkatao koborni manderangna aganengon, Congress-ni palo BJP-ni kosako chadengna amnagipa aro adokni manderangni namgnina kam ka·gipa gipin party-na Salgro Salaram gimikon mikpakma nienga, je kamkon ‘‘All India Trinamool Congress (AITC) chairperson Mamata Banerjee chu·sokatna amgen ine Sangma aganaha.
Ua agana, TMC-o napna gita Meghalaya legislator-rangni chanchianiara walsano chanchie daka ong·ja aro manderangni namgnina iani bidingo uamang ru·uta somoirangonin chanchisomanaha, jedakgipa kamrangkon Ma·mong Congress dilgiparangni ning·o ka·na man·ja, Mukul aganaha.
Chinga, Meghalaya, Northeast aro a·song gimikon bilakroroanggen. India gimikni manderangan BJP-ko dakgrikchakgipa dolko nangniktokenga. Didi-ni dilanio bang·arangan party-ona re·bakugen ine angade agantaikugen, Sangma aganaha.
Uni party-ko re·dilani bewalrang ka·dongna man·gipa ong·a. ‘‘TMC-o napangna gita chanchianio rakbegipade ong·aha indiba ian nangchongmotenggipa somoi ong·skaaha, Sangma aganaha.
A·songni dingtang dingtang a·dokni bang·a hajal hajal Congress worker-rang re·bana sike dongtokenga ineba Mukul aganaha.
Meghalaya-ni manderang 12 MLA-rangni apjitanganio chakpaaniko on·aha. Salgro Salaramni manderang ‘Didi’ ko aro TMC-ko ma·sitoka ine aganan baksa mikkang sal 45-ni gisepon an·chingni a·dokni pilak biaprangon Trinamool Congress-ni flag-rangko songdoako nikaignok ineba Sangma aganaha.
Meghalaya TMC-unit-na Charles Pyngrope-ko president songaha. Congress-oni ong·kate TMC-o napanggipa sak 12 Meghalaya-ni MLA-rangko West Bengal CM Mamata Banerjee, Kolkatao uni dongchakram Kalighat-o Sombaro mandera·e rimchaksoaniko dakangaha. Indake 2024 bilsio ong·nasienggipa Lok Sabha election-rangona maikae tarisogen, uarangni bidingo chanchirimna gita Banerjee-ni tom·dilgipa TMC-ni working committee tom·anioba Meghalaya legislator-rangko dongpaaha.
