SHILLONG: Meghalaya a·dokni SSA skulrango skigiparangna, uamangni man·na nangkuenggipa jabongani dormahaoniko jagninikosan on·aniara skigiparangna chu·ongjaenga ine Bristibar salo, Meghalaya SSA Schools Association (MSSASA) parakatenba, skigiparangna uamangni man·na nangkuenggipa chu·gimik dormahakon on·china gita sorkario dabiangaha.
Iani bidingo School Education & Literacy-ni Director Ambrose Ch Marak-na email gita sedoatengon, SSA skulrango skigiparang August jaoni December jaona gimik jabongani dormaharangko man·na nangkuengoba jagnini dormaharangkosan sorkari on·engkuani gimin ia skigiparangna bilsi gitalko manianio chu·ongjaenga ine MSSASA-ni president Aristotle C Rymbai parakatenba, skigiparangna uamangni man·na nangkuenggipa chu·gimik dormaharangkon on·china dabiangaha.
“SSA skulrango skigiparangna December jaona kingking dormaharangko on·na man·na gita a·dok sorkarioniko bi·dapatchina chinga didienga,” ine Rymbai parakataha.
SSA skulrango skigiparangna uamangni man·na nangkuenggipa chu·gimik dormaharangko on·kujaskal, skigiparangni non-cooperation movement (NCM) aro dingtang dingtang dake jingjengatanirangko dakangkugen ineba MSSASA-ni president parakataha.
SSA skulrango skigiparangna somoi gita dormaharangko on·rongjaengani gimin sorkarini kosako kusi ong·gijaniko mesokna gita re·baenggipa January 21 tariko skigiparang nisan gisimko ra·e tom·tome jingjengatanggen ineba MSSASA-ni president parakataha.
January-ni 21 tariko Meghalaya a·dokni bilsi 50 gapaniko a·dokni pilak biaprangon dal·bee manina siengachim ine nikna man·a.
