SHILLONG: Assam a·doko gitan Meghalaya a·dokoba Sukrobar sal dipet COVID-19-ni niamrangko olgrokatna gita a·dok sorkari tik ka·angaha.
Iani bidingo talataniko on·angengon, je manderangan COVID-19-ni tika ponggniko su·manahachim, uandakgipa manderangde Meghalaya a·dokona re·napbaengmiting somoio RT-PCR test-ko ka·na gita nangjawaha ine a·dokni Chief Minister Conrad K Sangma parakataha.
Chief Minister-ni parakatani gitade, a·dok gimikon da·o walni curfew-ba dongjawaha aro skulrangkoba, chong·motan Class 1-oni class 5-onaba da·o chu·gimik class-rangko ra·na man·gnok.
Mande sianirangoba district administration-ni permission-ko ra·chengna nangjawaha indiba COVID-ni niamrang, jekai mask-rangko gannani, jakrangko jaksujringani aro saksa sakgipinoni chel·tanggrike donganiko ja·rikangna nanggen ine Chief Minister parakataha.
“Manderangni jinma tom·dakanirangkode champengna nangkugen, uni gimin jinma tom·ani, jinma re·jomani aro uandakgipa program-rangnade deputy commissioner ba SDO-oniko permission ra·na nanggen aro uamangsa badita sak tom·na man·gen, ukode tik ka·e on·gen,” ine Sangma aganaha.
Tika matchote su·gimin manderangkode bar-rango, restaurant-rango aro cinema hall-rango napna on·aignok ineba ua parakataha.
Garirangko re·rurana on·ani gimin janapatskaengon, Shillong songjinmaode garirangko odd-even nomboro pangchake re·rurana on·angkugen ine Chief Minister parakataha.
COVID-ni niamrangko olgrokatna gita sorkarini tik ka·ani bidingo talataniko on·angengon, “Ia sal somoirango COVID man·giparang ka·sine komiroroangengaha aro sabisi inditana nangchakeaniko ra·bajaenga ine chinga nikna man·aha. COVID man·e sianggipa manderang bang·batan gipin saanirang dongani a·selsa siangaha ineba chinga nikna man·enga. Ia pilakko nigopesa chinga manderangni namgnina niamrangko olgrokatna tik ka·aha,” ine Chief Minister parakataha.
Dongimin niamrangko ja·rikangkuchina aro an·tangtangko naljoke rakkichina gitaba ua a·doko songdongenggipa manderangko didiataha.
