TURA: East Garo Hills a·jani Rongjeng-o rikenggipa Model Degree College-ko sorkarini tik ka·gimin koros aro sale on·gimin noksa gita rikjaha ine Budbar salo Rongjeng-ni GSU, FKJGP, ASWA aro AAYF dolrang, a·dokni Education Minister-na badi ka·e sedoataha.
Ia dolbri NGO-rangni parakatani gitade, ia Model Degree College-ko rikani bidingo saksa RM Sangma minggipa mandeni RTI ka·e sing·sandiaton, ia college-o academic aro administrative building-na gong 6,98,56,851-ko, boys hostel building-na gong 2,95,19458-ko aro girls hostel building-na 2,06,34,025-ko chamaha ine aganchakaniko on·ahachim.
Ia college-na noksako sale on·ani gitade, academic aro administrative building-o gadang gittim nok dongna gita nangachim indiba nokko rikmanchaaniode da·o gadanggnikosan rikaiaha ineba NGO-rang parakataha.
“RTI ka·anina aganchakaniko on·ani gitade, ia college-ko rikgipa contractor-na 8,97,63,567/-kode on·manahani gimin uan college gimikna chamgipaoni 70 percent-kode on·manaha ine chinga ma·sina man·aha. Ia tangkarangchi ia college-ni gnigipa gadangko man·chape chu·gimikkon matchotna man·gnokchim indiba kakketode ia college-o gnigipa gadangde dongja aro ground floor baksana skanggipa floor-san dongaia,” ine dolbri NGO-rang parakataha.
Ia Model Degree College-ko rikaniba namja ine matnangatengon, ia nokko rikaoni da·o jagittamsan ong·kuengpition nokkingode be·srianirangko nikna man·engaha aro ian mikkangchi college-o poraienggipa chatro chatrirangna kenchakna nangani ong·chongmotgen ine dolbri NGO-rang parakataha.
Iani bidingo Rongjeng-ni NGO-rang, Public Accounts Committee-ni chairman aro Opposition dolni dilgipa Mukul Sangma-naba sedoataha.
Adita salrangna skangsan, East Garo Hills a·jani Deputy Commissioner, an·tangan ia college-ona re·ange nienba, ia college-ko name matchotatna ja·ku de·gen ine ku·rachakaniko on·angahachim.
