SHILLONG: Maming champenganirang dongjagenchimode, dingtang dingtang skulrangna nangdapenggipa skigiparangko ia jani gisepon rakkidapgen ine Mongolbar salo, a·dokni Education Minister Lahkmen Rymbui, ku·rachakaniko on·angaha.
A·dokni bang·a skulrangon skigiparang chu·ongjaengani a·sel neng·nikanirangko chagrongna nangtokenga ine Opposition dolni dilgipa Mukul Sangma-ni matnanganina aganchakaniko on·angengon, skigiparangko rakkidapna gita sorkari kamrangko a·bachengengaha aro skigiparangko bakan rakkidapgnok ine Education Minister parakataha.
“Maming neng·nikanirang dongjagenchimode chinga jasani gisepon kamrangko matchotgnok,” ine ua aganaha.
Skigiparangko kamo rakkikamna gitade somoirangko nanggen ine janapatengon, skigiparang chu·ongjaenggipa skulrangna skigiparangko on·na gita sorkari mai dakgipa ja·kurangko de·enga ine Opposition dolni dilgipa Mukul Sangma sing·doangahachim.
Chatro chatrirang lekka poraniko ra·anio maming neng·nikanirangko man·jachina ine janapatengon, East Garo Hills a·jani skul damsao bilsisa batpiloba skigipako man·kujaenga ine Sangma, toe aganangaha.
Iani bidingo Selsella-ni NPP MLA Ferlin A Sangma-ba bakko ra·e aganangengon, skulrangko kulipiltaichina sorkari ge·etaniko on·engahaoba, sak 184 batpile skigiparangko kamo donatkujaengani a·selan Dadenggre-ni ning·o donggipa dam 23 skulrango skigiparang chu·ongjaenga ine parakataha.
Iana a·dokni Education Minister, aganchakaniko on·angengon, skigiparangko rakkidapna kamrangko ka·engon, iandakgipa skulrangna sorkari dingtang cholrangko on·skagen ine parakataha.
Rymbui-ni aganani gitade, re·anggipa bilsioba sorkari, skigiparangko rakkidapaha indiba mitam a·jarangode qualified ong·gipa skigiparang chu·ongkujaengachim.
A·dokni bang·bata LP aro UP skul nokrangan obosta namsrangjaengaha ine Selsella MLA-ni agangipa kattarangna aganchakaniko on·angengon, skul nokrangko sorkari taridape on·na a·bachengengaha ine Education Minister parakataha.
