TURA: North Garo Hills a·jani Dainadubi aro Damas jolrango songdongenggipa manderang, Damas-o gital Community & Rural Development (C&RD) Block office-ko songchina dabitokengani gimin Bristibar salo, North Garo Hills a·jani official-rang, songni nokni manderang baksa Damas songo tom·e apsan chanchirimangaha.
Ia tom·aniko North Garo Hills a·jani Additional Deputy Commissioner ZJ Sangma dakdilangaha aro tom·anio block officer-rang, Damas Area Development Committee aro samba jolo donggipa dingtang dingtang songni manderangba bakko ra·angtokaha.
Damas Area Development Committee (DADC)-ni u·iatani gitade, 2012 bilsio North Garo Hills a·jao songchengaonin Damas-o gital C&RD Block office-ko songchina gita ia committee dabidilengachim.
North Garo Hills a·jani ADC ZJ Sangma aro block officer-rangni dilanichi, Damas-o gital C&RD Block office-ko kulina gita dingtangmancha Damas jolo donggipa biap damgniko niangjolaha ineba DADC parakataha.
“Chingni dabianiko knachake Damas-o gital C&RD Block office-ko songna gita inquiry-ko dakchina ge·etahani gimin chinga skanggipa MDA sorkariko mittelpilna ska. Damas jolo donggipa manderang pilakan gital C&RD Block office-ko nangniktokengani gimin ia salo tom·e chanchirimaniona bang·a manderangan sokbatokaha,” ine DADC-ni secretary parakatenba, Damas jolo block office-nasan ong·aigija songni nokni namgnina pilak sorkari office-rangna biaprangko on·na man·aigen ine parakataha.
Damas-o gital C&RD block office-ko songani bidingo jinma chanchirima
Date:
Share post:
